Mange unødvendige utrykkingar

På landsbasis utgjer unødige alarmar opp mot 40-50 prosent av utrykkingar. Dette kan vera til dømes teknisk feil med alarmanlegg eller matlaging der steikeos utløyser alarmen.

– I Sveio har me dette året hatt heile 21 slike alarmar av forskjellig art. Unødige alarmar må ikkje forvekslast med falske alarmar, som er utløyst i ond hensikt, utan at brann har oppstått. Slike alarmer har me heldigvis yttarst sjeldan, kommenterer Kjetil Staveland, områdeleiar beredskap Haugaland brann og redning iks.

Åtte brannar

Brann- og redningsvesenet har mange ulike oppgåver, alt frå livstrugande til helseoppdrag med bæring og løfting.

I Sveio er det sidan nyttår blitt rykka ut til eitt tilfelle av brann i tunnell, tre tilfelle av brann i personbil, og fire bygningsbrannar.

Vidare har det vore fem trafikkulukker, to bergingar av verdiar, (mellom anna lensing av båt), og tre aksjonar mot akutt ureining. I tillegg har brann- og redningsvesenet hatt fleire mindre oljevernaksjonar på sjø etter utslepp frå båtar/skip.

Livredning

I helseoppdrag ligg alt frå assistanse til ambulanseteneste, til oppdrag der ein rykker ut for å redda personar, til dømes ved bruk av hjartestartar i påvente av ambulanse.

– Av hendingar som kan framhevast vil eg absolutt dra fram ein hjartestans i sommar, der mannskapa gjorde ein svært god jobb med hjarte- og lungeredning. Med hjelp av hjartestartar fekk dei liv i personen. Lokal beredskap reddar liv, fastslår Staveland.

20 brannstasjonar

Haugaland brann og redning iks har frå 2018 drifta brannvesenet i åtte kommunar på Haugalandet og har blitt eitt av dei største brannvesen i landet.

– Me er stolte av å vera lokal beredskap og har 20 brannstasjonar, deriblant Sveio- og Førde brannstasjon, med dyktige mannskap, seier områdeleiaren beredskap Haugaland brann og redning iks.