Les Vestavind GRATIS fram til vår nye abonnementsløysing er på plass!
nyhende
Mange fann fram til Finn fram-dagen, og nokre fann krabbar
Store og små strøymde til då Sveio Orienteringslag arrangerte Finn Fram-dagen på Førdestranda og i Rex Garden søndag. Saman med Sveio turlag, Lid 4H, Førde- og Buaspeidarane laga dei reine 17. mai-stemninga.
Leiar i Sveio Orienteringslag, Thomas Førde, er strålande nøgd med deltakinga. Finn Fram-dagen blei arrangert første gong i 2008 og er komen for å bli.
O-laget bemanna kiosk, luftgeværskyting og speedorientering. Speedorienteringspostane låg tett langs stranda, og det gjaldt om å registrera postane med ei brikke raskast mogleg.
Sveio turlag
Mange var innom stasjonen til Sveio turlag kor Jan Enerstvedt og Arild Wiersen tok tida på dei som haldt vassbøtter på strak arm. Meir enn 60 var innom styrkeprøven. Arne Valen klarte imponerande 2 minutt og 2 sekund.
Annonse
Lid 4H
O-laget hadde lagt ut 9 nye turorienteringspostar for dagen. Nokre av dei låg i Rex Garden og langs stiane der var det fleire aktivitetar ein kunne delta i. På stasjonen til Lid 4H fauk piler og hestesko om kvarande. 4H-arane hadde full kontroll og alle som ville fekk prøva.
Bua- og Førdespeidarane
Speidarane hadde sett opp leir på Førdestranda med bålpanner til grilling av pinnebrød, kanopadling og fleire aktivitetar. Dei overnatta i telt frå laurdag til søndag og viste godt igjen på stranda. Det blei populært å padle opp elva i god «Brødrene Dahl»-ånd.
Annonse
Bli med
O-lagsleiar Førde nyttar høve til å minna om at turorienteringspostane ligg ute fram til 20. oktober, og kven som helst kan hive seg med.
Torsdag 14. november skal dei ha årsfest på Førde samfunnshus med utdeling av merker, plakettar og premiar.
