nyhende
Madelen kom til verda på badet med pappa som jordmor
Anette Huse og Anders Høyvik venta sitt tredje barn med termin 28. mai. Men fødselen skjedde ikkje der ein fødsel vanlegvis skjer. Anette enda opp med å føda heime på badegolvet.
Familielukka er til å ta og føla på hos familien Huse/Høyvik på Udland i Haugesund om dagen. Anette Huse og Anders Høyvik blei nemleg nyleg foreldre til ei velskapt, lita dotter på ein gylden halvmeter og 3600 gram. Stolte er også storebrørne, Mathias på sju år, og Markus på snart 11. Familien er busett på Udland, nord i Haugesund.
Tok imot dottera på badet
At Anette skulle føda på badet var ikkje etter planen, men etter to tidlegare raske fødslar var ho førebudd på at det også denne gongen kunne gå raskt, men at det skulle gå så kort tid hadde ho ikkje trudd.
– Natt til fredag 22. mai gjekk vatnet og me gjekk heime og venta på at fødselen skulle koma skikkeleg i gong før me kunne dra til sjukehuset. Plutseleg bestemte veslejenta seg for at nå var det tid for å koma ut, og på ei kraftig ri med pappa som jordmor, blei ho fødd på baderomsgolvet, fortel den nybakte trebarnsmora Anette Huse som er oppvaksen på Åse i Sveio. Heldigvis gjekk det bra, både med henne og babyen, trass i ein uvanleg fødsel.
– Me hadde heldigvis god assistanse på telefon frå føda, og pappa klarte jobben som jordmor med glans, rosar Anette.
Stolte storebrør
Av telefonloggen med sjukehuset går det fram at fødselen pågjekk i 16 minuttar.
Imens sat to spente vordane brør i loftstova og venta på at veslesøstera skulle koma til verda.
– Gutane var veldig flinke medan det stod på. Mathias var den som fekk i oppgåve å ringja til mormor, Tove Huse, som bur i Sveio, for å seia at ho måtte koma og henta dei, og sjå etter ambulansen. Markus heldt seg til PlayStation. Storebrørne fekk koma inn og helsa på og sjå då navlesnora blei klippa, fortel Anette stolt.
Ivaretekne på beste måte
Mor og barn blei tekne med til sjukehuset av ambulansepersonell for vidare oppfølging.
– Det var to veldig kjekke karar som kom ifrå ambulansen i lag med ei flink jordmor. Me blei veldig godt tatt vare på og dei var utruleg hyggelege, rosar Anette.
Ho er ganske sikker på at no er det punktum for ytterlegare familieauke for hennar del. Men så skal det også seiast at det er stor rikdom i trekløveret som dei alt har fått!
