nyhende
Luna, Simba og Lukas – dette er dei mest populære namna for hund, katt og hest
Akkurat som med babynamn, er det òg tydelege trendar når det gjeld namn til kjæledyr. Luna er det mest populære namnet på både tisper og hokattar.
For hundar er Luna og Milo på førsteplass for femte året på rad, ifølgje forsikringsselskapet Agria , som kvart år fører lister over dei mest populære dyrenamna i Noreg.
På andreplass er Nala for tisper og Leo for hannhundar, etterfølgd av Saga og Max. Blant namna som har vorte meir populære, er Frida, Nelly, Atlas og Otto som no har klatra inn på topp 20-listene.
For hokattar er òg Luna på førsteplass og Nala på andre, etterfølgd av Bella. Simba er mest populært for hannkattar, deretter kjem Milo og Leo. Blant nye trendar er Stella, Lykke, Balder og Ozzy som no er å finna på topp 20-listene.
Også for hestar går nokre av dei same namna igjen. For hopper er Bella på topp, deretter kjem Frøya og Luna. For hingst/vallak er Lukas mest populært. På andreplass kjem Aragorn og deretter Knerten.
