nyhende
Lothepus om arkitekturprisen: – Stas når du veit at du har rett
Lothepus Camping vann årets heiderspris frå Arkitekturopprøret. Etter tidlegare kontroversar om bygget er ei stavkyrkje eller ikkje, vedgår ein stolt Leif Einar Lothe at sigeren smakte ekstra godt.
– Det var veldig kjekt. Eg er sjølvsagt stolt over prisen og alle som har vore med og fått det til, seier Leif Einar «Lothepus» Lothe til Nynorsk pressekontor, etter at stavkyrkja hans på Lothe Camping i Odda er kåra til vinnar av Arkitekturopprørets pris 2025 i lag med Blindern Studenthjem i Oslo.
Rundt 15.000 personar stemde i kåringa av den vakraste bygninga i landet. Fordi mange stemde på same tid, gjekk teljemaskina surr delar av siste veke. Stemmetala er derfor ikkje nøyaktige, men dei to toppkandidatane har følgt kvarandre tett undervegs og organisasjonen har difor valt å gi prisen til begge, opplyser dei i ei pressemelding.
Gamal tradisjon
Arkitekturopprøret, som arbeider for ein meir harmonisk og vakker byggjekultur, omtalar Lothepus sitt stavkyrkjebygg som eit bygg som skriv seg inn i ein eldgammal tradisjon. I prisutdelingstala peika juryformann Kristian Hoff Andersen på referansar til vikingtid og mellomalderbygningar. Juryen framheva òg at bygget er reist på ei tidlegare søppelfylling som no er gjort om til ein møteplass i ei bygd med identiteten i støypeskeia.
Lothepus sjølv var tydeleg glad etter å ha fått nyheita:
– Me er veldig stolte over dei som har teikna, snikra og laga kyrkja. Og ikkje minst over dei som har utsmykka ho, seier han på telefon til NPK.
Under nominasjonen vart kyrkja korkje presentert som eit tradisjonelt stavbygg eller ei kyrkje, men som «stavkyrkjebygning». Juryen framheva at bygget kombinerer moderne handverk med formglede og element frå eldgammal norsk arkitektur, og at Lothe og teamet hans har skapt noko unikt innanfor rammene av vår tid.
Kyrkje-kontroversen
Kontrovers rundt tittelen «stavkyrkje» har likevel prega debatten rundt bygget tidlegare. Kritikarar frå Noregs Kristne Råd og Fortidsminneforeningen har meint at det å marknadsføre bygget som ei «stavkyrkje» svekkjer både den religiøse og kulturhistoriske integriteten, og at konseptet utfordrar skiljet mellom kommersielle og heilaga funksjonar.
Då er det litt ekstra stas å vinne pris for kyrkja si, seier Lothe:
– Eg synest det er kjekt. Eg kjende jo at alle har gått imot oss, og så berre bånnar me på. Det er sjølvsagt stas når du veit at du har rett, legg han til.
På delt andreplass kom eit offentleg toalett/trafo i Lademoparken i Trondheim og Pedersgate 26 i Stavanger.
