nyhende
Lønstal for 2025: Sveio bak fleire nabokommunar, menn har hatt størst vekst
Nye tal frå Statistisk sentralbyrå viser at Sveio kjem dårlegare ut enn fleire av nabokommunane i lønnsoversikta. Samstundes har menn hatt større lønnsvekst enn kvinnene.
59.650 kroner var det sveibuen hadde i gjennomsnittleg månadsløn i 2025. Samstundes viser statistikken at det var mindre lønsamt å jobba i sjølve kommunen. For dei som hadde arbeidsplassen sin innanfor Sveio sine kommunegrenser, var den gjennomsnittlege månadslønna 54.360 kroner.
Relativt små skilnader
Utsira skil seg tydeleg ut i toppen, men elles er skilnadene mellom kommunane i regionen relativt små. På oversikta over kommunane der innbyggarane har høgast gjennomsnittleg månadsløn, hamnar Sveio på 7. plass. Utsira toppar med 65.070 kroner, framfor Haugesund med 62.500 kroner og Bømlo med 61.710 kroner, medan Etne ligg nedst med 57.150 kroner.
Ser ein på kva for kommunar det er mest lønsamt å ha arbeidsplassen sin i, fell Sveio éin plass ned til 8. plass, og har berre Etne bak seg. Også her tronar Utsira øvst med 68.150 kroner, framfor Tysvær med 62.990 kroner og Haugesund med 60.850 kroner.
Dette jobbar sveibuane med
Helse- og sosialtenester er den største næringa blant dei som bur i Sveio, og sysselset 21,4 prosent. Industri står for 11,3 prosent, bygg- og anleggsverksemd for 11 prosent og varehandel for 10,9 prosent.
Statistikken viser også tydelege skilnader mellom kvinner og menn: Kvinner jobbar i stor grad innan helse og undervisning, medan menn dominerer mellom anna i industri, bygg og anlegg og transport.
Ulik lønsvekst for kvinner og menn
Tala viser også korleis løna i Sveio har utvikla seg over tid. I 2020 hadde sveibuen ei gjennomsnittleg månadsløn på rundt 47.000 kroner. Fram til 2025 har snittlønna auka med om lag 12.650 kroner.
Samtidig viser statistikken at veksten ikkje har vore lik for kvinner og menn. Menn i Sveio har auka den gjennomsnittlege månadslønna si med 13.400 kroner frå 2020 til 2025, medan auken for kvinner har vore 11.520 kroner.
Det betyr at mennene har hatt ein lønsvekst som er 1.880 kroner høgare i månaden i denne perioden. Rekna om til 12 månadsløner utgjer det 22.560 kroner meir i året.
