nyhende
Lokale reglar og råd til nyttårsfeiringa
Du kan ikkje bryke fyrverkeri heile døgnet – og her er råda for å behalde eit godt naboskap etter feiringa.
VESTAVIND/NPK: Sveio kommune minnar i samarbeid med Haugaland Brann og Redning om kva tidspunkt det er lov å nytte fyrverkeri, på si nettside.
Tidpunktet er mellom klokka 18 nyttårsaften og fram til klokka 02 den 1. januar.
— Fyrverkeri kan sendast opp dei fleste stader, men vi råder til å ta hensyn til menneske, dyr og bygningar/kjøretøy.
— Må tole litt meir støy
For mange er det ein viktig tradisjon å kunne møte gode venner eller familie på nyttårsfesten. Likevel er det somme forholdsreglar ein burde ta før ein inviterer.
– Litt meir støy må vi tole kring nyttår og julefeiring, men ikkje meir enn at ein kan leve med det. Ein må hugse at ordensreglar og vedtekter i burettslag og sameige framleis gjeld, seier Line Bjerkek, advokat og fagleg leiar ved advokatkontoret i Norsk Boligbyggelag (NBBL) i ei pressemelding.
Nabovarsel og opprydding
Bjerkek minner om at det kan vere lurt å varsle naboar om festen på førehand, og gi naboen moglegheit til å kontakte deg dersom lydnivået blir plagsamt. Ta ein hyggjeleg prat med naboen i trappa, legg lapp i postkassa eller heng opp ein lapp i oppgangen der du bur, foreslår advokaten.
Det er òg greitt å hugse på å rydde opp etter seg dersom ein har nytta fellesareal som takterrasse eller andre uteområde.
– Dersom det oppstår usemje om støy eller forsøpling er det gjerne lurt å overlate oppfølging av brot på ordensreglar til styret. Å vere raus og romsleg der ein kan, er ein god leveregel også i burettslag og sameige, understrekar Bjerkek.
