Lions klubb svolten på meir

— Me pleier å seia at sjela til Lions ligg i lokalsamfunnet, seier Egil Lokna.

Saman med kamerat Bjørn Midteide er dei begge aktive i Lions klubb i Sveio. No som snøen forhåpentlegvis sluttar å falla frå himmelen, og blomane kjem, står dei klare for å halda nye arrangement.

Går til velgjerd

— Det er ein av mange måtar me tener pengar på. Me er vel ein humanitær serviceorganisasjon, seier Midteide.

Seinare i mars skal dei halda ein aftan med middag, underhaldning og dans i Førde. Pengane går til velgjerd. Dei har gode erfaringar med slike kveldar, men det har ikkje vore mogeleg dei siste åra.

— I 2019 hadde me både vårfest og julebord. Då tente me mykje pengar slik at me heldigvis hadde noko til overs i koronaåra, seier Lokna.

Pengane dei tener går utelukkande til velgjerd og prosjekt som Lions tek føre seg. Det er dei begge nøgd med, at organisasjonen på ein måte har to økonomiar.

— Det er medlemsavgifta åleine som dekker utgiftene. Alt me tener går i ei eiga kasse, seier Lokna.

Gamle vener

No er dei glade for å endeleg kunne køyra på igjen som før. Midteide fortel at bandet som skal spela kjem frå same stad han eigentleg er frå.

— Dei er frå Haugesund, og lagar godt stemning, humrar han.

Lokna er derimot sveibu frå barndomen av, men dei to har likevel eit langt venskap bak seg.

— Egil var forlovar i bryllaupet mitt, seier Midteide.

Det er over 50 år sidan. For om lag 10 år sidan vart Lokna med i Lions, og tre år seinare drog han med seg Midteide.

Ynskjer nye velkomne

I år har Sveio hatt ein Lions klubb i 44 år, og dei ynskjer å få med fleire nye medlemmar.

— Me er 24 personar no, seier Midteide

— Hos oss er det mange menn og alderen høg, så me ynskjer både fleire yngre, og gjerne fleire kvinner, seier Lokna.

— Kor mange har dykk lyst å verta?

— Ha,ha, 50! ler Midteide

— Det er ikkje eit mål i seg sjølv, men mogelegvis 30, seier Lokna.

Lokalt forankra

Sjølv om Lions er ein internasjonal organisasjon, gjer dei også mykje lokalt.

Då ein familie i Sveio vart råka av ein tragedie for nokre år sidan, midt i ein overgangsfase, hjalp lokallaget familien. Då gav dei både pengar og fleire titalls dugnadstimar til nokon i ei vanskeleg tid.

Og så er dei opptekne å teke vare på Salamander-parken.

— Mottoet til Lions er «til teneste», seier Midteide.

To gonger årleg går dei i gong med rydding, kvisting og plukking av søppel. Nokre gonger vert dei overraska over kva som skjuler seg.

— Me har funne stoler frå middagsbord og bildekk seier Lokna.

— Det er ein attraktiv plass for barn å leika, og då må me passa på at det er salamandrar der, seier Midteide.