Lillebjørn Nilsen er død

– Lillebjørn Falk Nilsen sovna stille inn laurdag kveld den 27. januar med sine næraste rundt seg, skriv plateselskapet Grappa måndag.

Med han har ein artist med songar som var allemannseige og som var heilt i front av visebølgja, gått bort.

Bjørn Falk Nilsen vart fødd 21. desember 1950 i Oslo, byen som pregar mange av songane hans. Lillebjørn Nilsen vart kjend allereie som 16-åring i The Young Norwegians, ein duo med Bjørn Morisse. Det var her han fekk kallenamnet Lillebjørn.

Gjennom karrieren sin laga han ei mengd songar som har gått inn i DNA-et slik Alf Prøysens musikk har gjort. Han spelte ei rekke strengeinstrument, og lærte opp generasjonar med «Lillebjørns gitarbok».

Song på norsk

Lillebjørn Nilsen fekk mellom anna Prøysenprisen, Oslo bys kunstnerpris, Oslo bys kulturpris og seks Spellemannprisar, sist heidersprisen i 2023.

Han vart også utnemnd til riddar av 1. klasse av St. Olavs Orden for visekunsten sin.

Han var påverka av amerikansk folkemusikk, men plukka også opp inspirasjon frå norsk og annan musikk. Allsidigheita førte også til at han gav ut den populære barneplata » … Og Fia hadde sko».

Det var særleg som soloartist med tekstar på norsk han markerte seg, men også i samarbeid med andre, blant dei Steinar Ofsdal, Ballade!, Gitarkameratene og Hot Club de Norvège.

«Tanta til Beate»

Fleire av songane til Lillebjørn Nilsen har vorte allemannseige – og det er ikkje mange som ikkje har nynna til songar som «Tanta til Beate», «Stilleste gutt på sovesal 1», «Bysommer», «Barn av regnbuen», «Haba haba!», «Ola Tveiten», «Se alltid lyst på livet», «Alexander Kiellands Plass», «1000 søte damer», eller «God Natt Oslo», for å nemne nokre.

LP-en «Nære Nilsen» vart gitt ut i 1993, og vart hans siste og tiande solostudioalbum.

– Før kalla vi det røter, ikkje roots. Musikklivet er avhengig av trendar, men eg har spelt sånn som dette i alle år. For meg blir det feil å bu i Oslo og ha sine musikalske «roots» i Texas, sa han til NTB i samband med utgivinga.

«Barn av Regnbuen»

Tilknyting til folkemusikk og viser frå USA vart ytterlegare forsterka gjennom vennskapen hans med nestoren Pete Seeger.

Nilsen fekk ein av sine største med den norske versjonen sin av «My Rainbow Race», «Barn av Regnbuen».

Det var nettopp denne songen han framførte eit år etter terrorangrepa 22. juli 2011. Eit smekkfullt Youngstorget song med Lillebjørn som helsa frå Seeger. Songen vart også framført som allsong over heile landet.

Under ein konsert med Gitarkameratene i Grieghallen i 2013 kollapsa han på scena og måtte følgjast ut. I etterkant har han fortalt at det hang saman med ein kreftoperasjon.

Etter kvart trekte han seg meir bort frå offentlegheita, men heldt fram med å halde konsertar i avgrensa omfang.