– Ligg an til nytt rentekutt i september

– Dette var rimeleg i tråd med det som var venta, så sånn sett vil ikkje dette bidra særleg verken den eine eller andre vegen, seier sjeføkonom Kjetil Olsen i Nordea Markets til NTB.

Prisveksten i juni enda på 3 prosent, medan den underliggjande prisveksten, den såkalla kjerneinflasjonen (KPI-JAE), var på 3,1 prosent.

– Det er heilt i tråd med prognosane, og prognosane er ganske tydelege på at det ligg an til nytt rentekutt i september, seier Olsen.

– Som venta

Sjeføkonom Kjersti Haugland i DNB Markets og sjeføkonom Kyrre M. Knudsen i Sparebank 1 SR-Bank seier òg at det var nokolunde som venta.

– Så langt går det akkurat som venta med inflasjonen i Noreg. Det var ein oppgang i inflasjonstakten, men det låg i korta at det kom til å skje. Det kjem av eit uvanleg fall i prisen på flyreiser og pakkereiser i fjor som ingen trudde kom til å bli gjentekne i år, seier Haugland til NTB.

Ho seier at Noregs Bank trur at inflasjonen kjem til å liggja på omtrent same nivå ut året.

– Desse tala er omtrent som Noregs Bank venta. Prisveksten er uendra på 3 prosent, som er litt mindre enn Noregs Bank hadde venta, medan det er ein liten oppgang i kjerneinflasjonen, som også var venta, seier Knudsen til NTB.

Godt nytt for renta

– Dette byggjer opp om rentebanen Noregs Bank har lagt, som signaliserer rentekutt i september. Så sjølv om inflasjonen stig, er desse tala godt nytt for neste rentekutt, seier Knudsen.

Det same meiner Haugland.

– Me trur framleis på rentekutt i september og desember, seier ho.

Knudsen understrekar likevel at kronekursen er litt svakare enn Noregs Bank har lagt til grunn.

– Sånn sett er rentekuttet avhengig av at krona ikkje svekkjer seg vesentleg frå dagens nivå, seier han.