Leseløft frå regjeringa: Eit kvarter av kvar einaste skuledag blir sett av til lesing

Statsministeren la måndag fram hovudsatsingane på skulen på Deichman bibliotek på Tøyen i Oslo. Dei vil bruke ein milliard kroner ekstra samanlikna med i dag på å løfte leseferdigheitene til norske elevar.

– Bøker er eit stikkord og eigentleg ein kontrast til det barn møter i skulen i dag – nemleg skjermar, seier statsminister Jonas Gahr Støre under pressekonferansen.

Regjeringa ønskjer å bruke éin milliard kroner ekstra over dei neste fire åra på eit nasjonalt leseløft.

– Alvorleg

Det regjeringa omtaler som eit leseløft, skal starte neste år og inneber nokre hovudtiltak. Til dømes skal alle elevar som strevar med lesing, få rask tilpassa hjelp, og det skal setjast ned ein nasjonal lesekommisjon som skal lage ein ny lesestrategi for Noreg.

– Før var norske barn blant dei beste lesarane i verda. Men i dag går 15.000 elevar ut av grunnskulen utan å kunne lese skikkeleg. Det er alvorleg. Norske barn skal igjen bli blant dei beste lesarane i verda, seier Støre.

Samtidig skal alle elevar på alle klassetrinn lese minst 15 minutt kvar dag på skulen, og dei skal få tilgang til fleire fysiske bøker.

– For skjermbasert

Også kunnskapsminister Kari Nessa Nordtun og arbeids- og inkluderingsminister Tonje Brenna var med på framlegginga.

Nordtun meiner regjeringa overtok ein skule med historiske dårlege læringsresultat.

– Skulekvardagen hadde vorte for skjermbasert, for teoritung og for stillesitjande, seier kunnskapsministeren.

Ho meiner likevel ikkje at løysinga er å gi elevane enda meir av det same.

– Difor gjer vi kraftfulle grep for å snu den negative utviklinga slik at elevane lærer meir og betre, seier Nordtun.

– Valløfta manglar ambisjonar

Sylvi Listhaug (Frp) rettar kritikk mot Arbeidarpartiets nye skulepolitiske utspel. Ho meiner at det heller trengst fleire alternative skuletilbod og nivådelt undervising.

– Skal vi snu kursen for å få på plass ein skulepolitikk som ser kvar enkelt elev, og som skaper ro og orden i klasseromma, held det ikkje berre å flikke på dagens feilslåtte politikk, vi treng systemendringar, seier ho.

Nestleiar Tina Bru i Høgre meiner valløfta manglar ambisjonar.

– 15 minutt er eit temmeleg lite løfte når vi veit at over 15.000 elevar går ut av skulen utan å kunne lese skikkeleg, seier ho.

Viser til foreldra

Til NTB fortel statsministeren at det ikkje er klart kva lesekvarteret skal ete opp av tida i skulen.

– Det er ei lita nøtt å knekkje, men det handlar hovudsakleg om organisert tid for barna til å sitje roleg ned, seier Støre og understrekar at fleire lærarar allereie fokuserer på dette.

Samtidig meiner han at mykje av ansvaret ligg mykje hos foreldre og besteforeldre.

– Dei må vise ungane at dei kan opptre utan skjerm, at dei les for seg sjølve og at dei les for barna, seier Støre.

Hans beste lesetips er rett og slett å begynne å lese, spørje om råd på biblioteket og velje bøker som engasjerer.