nyhende
Ber hus- og hytteeigarar sjekka for vasslekkasjar:
Lekkasje ikkje funne – ber óg om at folk sparar litt på vatnet
Dårleg trykk skuldast lekkasje, som per no ikkje er lokalisert, og bebuarar i området blir oppmoda om å kontrollera sine private anlegg.
Laurdag kveld var det endring i temperaturen. Det blei mildare og frosten slapp taket. Det har ført til at Sveio kommune har hatt ei stor auke i vassforbruket.
På eigen nettstad, skriv Sveio kommune søndag ettermiddag at abonnentar på det kommunale vassverket nord for Førde har dårlig trykk i nettet. Dette skuldast ei lekkasje i området Straumøy–Vihovde–Valestrand–Valevåg.
Sjekk hus og hytter
– Me oppmodar alle til å sjekka hus og hytter, seier Torbjørn Larsen, vakthavande på vatn og avløp i Sveio kommune.
Mykje av det kommunale vassleidningsnettet er sjekka ut, derfor er det naturleg å tenka at frostskadar ute hos abonnentane kan vera årsaka.
– Det var i 21-tida i går kveld mildvêret kom. Forbruket blei høgare over heile linja, spesielt nordanføre, seier Larsen, som har vore ute store delar av kvelden i går, og natt til søndag.
Spar litt på vatnet
Kommunen har søkt etter lekkasjen siden laurdag kveld, og det blir framleis søkt etter lekkasjen søndag. Det kan vera ein lekkasje på det kommunale nettet, men det er òg mogleg at lekkasjen er på ein eller fleire private stikkleidningar, utekranar eller tilsvarande som er frosne i kuldeperioden som har vore, og no står og lek etter at det blei mildvêr. Dersom du bur i området, sjå gjerne gjennom ditt private anlegg, skriv kommunen.
Dersom du har informasjon om saka, kan ein ringa vakttelefon for VA 915 38 730.
– Dersom abonnentane sparar litt på vassforbruket no til lekkasjen er lokalisert, vil det framleis vera nok vatn til alle. Me skal komma tilbake med informasjon så snart lekkasjen er lokalisert, lovar kommunen.
