Lærarstreiken blir igjen trappa opp

Askøy, Alver, Øygarden og Hustadvika er nye uttaksområde. Barnehagar og elevar i førsteklasse blir også skjerma denne gongen, skriv Utdanningsforbundet i ei pressemelding.

– KS har avvist løysingsforslaga og visene våre direkte motvilje til å få slutt på denne streiken. Vi har lagt på borda forslag som kan bidra til å gi elevane fleire lærarar med lærarutdanning, bidra til at lærarane ikkje blir lønnstaparar endå ein gong – og gi lærarar med lang utdanning og erfaring eit betre resultat, seier Utdanningsforbundet-leiar Steffen Handal.

– Alvorleg

Utdanningsforbundet meiner regjeringa må på banen og leggje press på det raudgrøne fleirtalet i styret i kommuneorganisasjonen KS for å få slutt på streiken. Arbeids- og inkluderingsdepartementet seier likevel til NTB at det er opp til partane i streiken å semjast. Samtidig oppmodar kunnskapsminister Tonje Brenna (Ap) partane til å finne ei løysing.

– Det er alvorleg når elevane våre ikkje får møte på skulen. Derfor oppmodar eg partane til å prøve å finne ei løysing og anstrengje seg for å få til det sånn at barn og unge kan komme tilbake på skulen, seier ho til NRK.

KS meiner dei har strekt seg langt

– Utdanningsforbundets motkrav er umoglege å innfri, både av omsyn til kommuneøkonomien og til tariffavtalen som er inngått med alle andre fagforbund i kommunesektoren, seier Tor Arne Gangsø, arbeidslivsdirektør i KS.

Han seier at dei har strekt seg langt og komme lærarane i møte med fleire konkret forslag til å løyse streiken, men alt har vorte avvist.

– Utdanningsforbundets nye varsel om opptrapping av streiken rammar først og fremst elevar og foreldre. Dette er ein veldig alvorleg situasjon for over 100.000 barn og unge som blir ramma av denne langvarige streiken, seier Gangstø.

Riksmeklaren gir ikkje opp

Partane har vore i kontakt med riksmeklar Mats Ruland, men forsøket på å finne ei løysing stranda. Ruland seier til NRK at han planlegg nye samtalar med partane i løpet av veka.

– Det er ein ganske fastlåst og vanskeleg situasjon, men vi gir ikkje opp, seier Ruland.

Streiken fekk ei kraftig opptrapping tysdag då 3.000 medlemmer i Utdanningsforbundet vart teke ut. No aukar presset på partane. Mellom anna har Barneombodet sendt eit brev til Kunnskapsdepartementet for å gi uttrykk for si bekymring.

– Partane har eit ansvar for å løyse konflikten. Den rammar no mange elevar, og det er uheldig om dette blir langvarig, seier Ruland.

Skuldar KS for å spekulere i lønnsnemnd

Steffen Handal seier han beklagar sterkt at Riksmeklaren måtte gi opp forsøket på å finne ei løysing som begge partar kunne leve med. KS spekulerer i at elevane etter kvart blir ramma så hardt at streiken endar med tvungen lønnsnemnd, meiner han.

– Løysingsforslaga våre var edruelege og kan gjennomførast utan å bryte frontfagsramma, understrekar Handal.

KS har tidlegare tilbakevist at dei ikkje har komme lærarane i møte. Forhandlingsleiar Tor Arne Gangsø viste førre veke til at dei har lagt fram eit konkret forslag til løysing. Han reagerte også kraftig på utsegner om at KS skulle spekulere i tvungen lønnsnemnd.

– Det er ein heilt grunnlaus påstand. Det er Utdanningsforbundet som vel å trappe opp streiken, sa han til NTB måndag.