Kyrkjetårnet heist på plass

82 år etter at ho blei vigsla, har Førde kyrkje no fått ei betydeleg oppgradering av utvendig fasade. Torsdag blei det nye kyrkjetårnet med kopartak, autentisk til det gamle, heist på plass. Mange hadde stilt seg opp i god tid for å få med seg den historiske hendinga.

Rehabilitering av Førde kyrkje starta i slutten av juli. Oppdraget har i korte trekk bestått av nytt tårn med kopartekking, pussreparasjonar fasade, i tillegg til maling av fasade, vindauge og dører.

Haakull & Ersland AS har vore totalentreprenør og hatt med seg fleire ulike underentreprenørar. Murmester RB Johannesen, Malermester Langelandsvik AS, Haugesund Blikk AS, Helgevold Elektro, ERA Stillas og BJ Kran.

Roteskader dukka opp

– På tårnet var det planlagt å skifta sutak, takrenner og ny kopartekking. Men då me starta rivinga, oppdaga me roteskader i bærekonstruksjonen. Skadane var så omfattande at me ikkje kunne skifta ut eller reparera delar av konstruksjonen. Saman med Sveio kommune konkluderte me med at tårnet måtte rivast og byggjast opp på nytt, fortel dagleg leiar i Haakull & Ersland AS, Espen Vestbø.

Verksemda har tidlegare erfaring med å byggja kyrkjespir nede på bakken og heisa desse opp ferdige.

– Me har blant anna utført dette på Kopervik kirke og Skjold kyrkje tidlegare, opplyser Vestbø.

Bygd opp i Skjold

Bærekonstruksjonen til Førde-tåret blei skore ut på lageret i Skjold, og frakta deretter ut til Førde. Her blei spiret montert utanfor kyrkja i slutten av september. Torsdag blei det plassert slik det gamle stod, og festa til dei same åtte boltane som har vore brukte sidan 1938.

– No gjenstår montering av fire nye luker i tårnet og litt flikking hist og her. Me reknar med at stillaset blir riven i slutten av oktober, opplyser Vestbø. Han trekkjer fram det gode samarbeidet med Sveio kommune og byggjeleiar Per Riise.

– Me har saman funne løysingar til det beste for prosjektet, fastslår Vestbø.

2,6 millionar kroner

Kommunen sitt budsjett var på 2 millionar kroner inkludert moms. I tillegg bidrog kyrkja med 370.000 kroner frå ein privat givar i 2017. Sluttsummen er berekna til vel 2,6 millionar kroner inkludert moms.

– Utskifting av dei fire tårnlukene var ikkje med frå starten, men då det blei oppdaga at dei var i dårleg forfatning valde me å skifta dei ut når me først hadde stillas på plassen, fortel Per Riise, prosjekt- og byggjeleiar i Sveio kommune. Han skryt over arbeidet som er gjort:

– Haakull & Ersland sine folk og underentreprenørar, er dyktige handverkarar, me er svært godt nøgde med arbeidet som er utført.

Førde kyrkje er teikna av arkitekt Torgeir Alvsaker og vigsla 22. september 1938 av biskop Fleischer. 1. juli 1981 vart namnet på soknet endra frå Vestre Vikebygd til Førde.