nyhende
Høgt smittepress i Sveio:
Kvar 14. innbyggar er koronasmitta
Smittepresset er høgare enn nokon gong før i Sveio kommune.
407 personar, omtrent kvar 14. innbyggjar, var registrert koronasmitta i Sveio kommune sist veke.
— Me har smitte i alle einingane våre. Det er smitte på sjukeheimen og blant brukarar både i habilitetstenesta og i heimetesta, seier kommunalsjef for helse og omsorg Ingunn Toft i Sveio kommune.
Ikkje berre korona
Og det er ikkje berre pandemien som herjar i kommunen for tida.
— Det er også anna luftvegssjukdomar og omgangssjuke som går no, så med merkar eit høgt press no, seier ho.
Like fullt har Sveio kommune makta å holde alle tenest sine oppe denne veka.
— Det har nok samanheng med den nye KS-avtalen som sikrar dei tilsette 200 prosent overtidsbetalt, seier ho.
Men Toft legger til at også den ordninga har ei grense.
— Mange tilsette er slitne, og mange har ein krevjande arbeidssituasjon, seier ho.
Toft seier at ho sjølv trur at Sveio er inne i ein smittetopp denne veka, og at den kan vare ut neste veke.
— Eg håpar eg har rett i det, seier ho.
Denne veka er det vinterferie i skulen, noko ein håpar kan bidra til å dempe smittepresset noko.
Alt opent tysdag
Sist veke stengte barnehagen ved Valestrand oppvekstsenter i to dagar, og også dagsenteret i Sveio har vore stengt tidlegare, men per tysdag denne veka var alle kommunale tilbod i drift som vanleg.
— Det gjerast fortløpande driftsvurderingar ut frå smittesituasjonen, opplyser ordførar Linn Therese Erve (Ap) til Vestavind.
