– Kor klarar me å stå saman lengst mogleg?

Torsdag kveld fekk i underkant av 30 tilhøyrarar i kommunestyresalen med seg ei 45 minuttar lang oppsummering frå Telemarksforsking sin rapport med tittel Utredning av framtidig fylkestilhørighet for Sveio kommune.

Bent Aslak Brandtzæg i Telemarksforsking har vore prosjektleiar for rapporten, og det var han som hadde tatt turen til Sveio for å presentera hovudpunkta for sveibuen, og svara på spørsmål. I tillegg til dei frammøtte, hadde rundt vore 100 innom direktesendinga då møtet var over.

Tynn rapport

Fleire av tilhøyrarane kom med sine innspel, ei av dei var Gjertrud Svartveit Osmundsen, som presenterte seg som bonde og nyvald leiar i Sveio bondelag. På bøndene sine vegne, er ho bekymra for framtida viss Sveio går inn i Rogaland.

Delen av rapporten som tar føre seg landbruk kallar ho frykteleg tynn, og ramsar opp fleire årsaker til det.

– Ein seier at ein har mest tilknytning sørover i forhold til rådgiving og der me leverer slakt og melk. Det er eigentleg berre tull. Rådgjevingsapparat er nasjonalt, det same er levering av melk og kjøt, opplyser ho.

Tilskot

Ho viser til at det er sagt at bøndene ikkje vil mista 1 krone og 10 øre for kiloen på grisekjøt om det blir fylkesbyte. Sjølv har ho fått andre svar, noko som får ho til å vera skeptisk på denne delen av rapporten. Som bonde i Rogaland kan mjølka bli 20 øre mindre verdt per liter, men mest sannsynleg vil dei klara å behalda mjølkeprisen.

– Dersom me mister begge dei to tilskota, utgjer dette over 1,2 millionar kroner i årlege tap for Sveiobonden, seier Svartveit Osmundsen.

Erfaringar frå Ølen

Ein politikar lurte på om erfaringar frå Ølen kommune, som gjekk inn i Vindafjord kommune i 2006 var tatt med i rapporten, noko Brandtzæg kunne bekrefta, i form av kontakt med tidlegare ordførar i Ølen, Arne Bergsvåg. Det blei opplyst at han vil vera med i eitt av dei andre folkemøta.

– Har de vurdert dette med kommunesamanslåing, undra ein tilhøyrar.

Varaordførar og ordstyrar for kvelden, Ruth G. Østebøvik Eriksen (FrP) opplyste at samanslåing med Haugesund ikkje var ein del av debatten – og at det heller ikkje vil vera ei naturleg følgje ved eit eventuelt fylkesbyte.

Kostnadar

Sp-politikar Arne Valen fortalde at han er opptatt av å byggja eit samfunn i Sveio, som ein kommune som står saman.

– Kor klarar me å stå saman lengst mogleg? For meg er det viktig at me byggjer ein kommune der me står skulder ved skulder i lag, og ikkje får ein delt kommune, sa Valen.

Rådmann Jostein Førre fekk eit konkret spørsmål frå Alfhild Vikse, som lurte på om det ville utløysa ein økonomisk gevinst om Sveio kommune bytar fylke. Nokon lurte også på kostnaden med prosessen.

– Inntektssystemet blir ikkje påvirka, svara rådmannen, som anslår at sluttsummen med folkerøysting inkludert, vil komma på mellom fire og fem hundre tusen.

Ein annan tilhøyrar lurte på kva prisen er for å byta fylke, og fekk til svar at den største kostnaden vil vera å leggja om eigedomsregisteret og eigedomsnummera. Å byta fylke vil i seg sjølv ikkje utgjera ein stor kostnad.

Tosidig

Kåre Bua hadde ein lengre kommentar der han såg på Haugalandet og Sunnhordland som ein tyngre region, der Sveio kunne hatt ein fordel i Rogaland. På krinsnivå lokalt, trur han ikkje at effekten ville blitt så god.

– På regionalt nivå vil det vera ein fordel å få dette stort og samanhengande, men på kommune- og krinsnivå, vil det lett sjå motsett ut, for i kva grad kan me trekka til oss ting til Sveio i denne regionen, kommenterte Bua.

Torsdagsmøte

Varaordførar Eriksen, som steppa inn for ordføraren denne kvelden, oppmoda alle til å møta på dei tre neste møtene, som har tema landbruk, ungdom og unge vaksne i Sveio samt regional utvikling/utvikling av Sveio. Neste møte blir torsdag 28. oktober i kommunestyresalen – kva tema ein går laus på er ikkje bestemt enda.