Kong Harald fyller 87 år i dag

Kongehuset kunne måndag melde at kongen er på ein privat tur til utlandet neste veke, men turen kan ha starta før. Dermed kan det tenkjast at han feirar dagen i utlandet, noko han har gjort fleire gonger før.

Seinast på 85-årsdagen i 2022 drog kongen og heile den nære familien på vinterferie saman i utlandet.

Kong Harald vart fødd 21. februar 1937 på Skaugum og er med dei 87 åra sine den eldste monarken i Europa.

Men trass i alderen legg 87-åringen bak seg eit spennande og aktivt år, med offisielle reiser i både inn- og utland.

Fanget laks på 10 kilo

Målet til kongen er å besøkje alle kommunane i landet, og etter fylkesturen til Nordland i fjor sommar manglar han berre 18 av 357 kommunar. I oktober fekk han også hukt av Flå kommune på lista si.

I august var kongen i Mjøndalen og fekk sjå konsekvensane av ekstremvêret Hans på nært hald. I mars besøkte han Garnisonen i Sør-Varanger, som vaktar den norske grensa mot Russland.

Sidan sist bursdag har kongen også gjort ein storfangst. På den årlege fisketuren sin i Altaelva i fjor sommar drog han opp ein laks på over 10 kilo, kunne Altaposten melde.

– Det var ein heilt vanleg laks på mellom 10 og 11 kilo, så fisk – det fekk ein. Men det var litt lite vatn, og det var varmt i vatnet, sa kongen.

Snubla i Danmark

I september var kongeparet på feiringa av svenske kong Carl Gustafs 50 år på trona, og i juni var kongeparet på offisielt besøk i Danmark.

Danmarksturen starta litt turbulent då kong Harald snubla på den raude løparen, men han tok fallet med humor, noko han er godt kjend for.

– Vi hadde ei mottaking der eg demonstrerte min nasegruse beundring for dronning Margrethe – det gjekk fint, sa kongen i etterkant.

Her i Noreg har kongen teke imot både Ukrainas president Volodymyr Zelenskyj i desember og eit statsbesøk frå Tanzanias president Samia Suluhu Hassan no i februar.

Dei feira også kronprins Haakon og kronprinsesse Mette-Marits 50-årsdagar i bakgarden på slottet på sommaren.

– Gørrkjedeleg

Det siste året har også bode på nokre sjukdomsperiodar for kongen, og han har vore sjukmeld med infeksjonar og koronasjukdom.

I fjor sommar var han innlagd på Rikshospitalet i ei veke.

– Det eg kan seie, er at det var gørrkjedeleg, sa kongen og lo godt då han skulle samanfatte sjukdomsopphaldet i etterkant.

– Varer livet ut

Kong Harald har tidlegare gjort det klinkande klart at han kjem til å utføre sine plikter til «the bitter end», og at han ikkje har tenkt å abdisere.

Det gjentok han også i januar, litt over ei veke etter at danske dronning Margrethe abdiserte trona til fordel for son sin, kong Frederik 10.

– Eg held fast på det eg har sagt heile tida, at eg har avlagt ein eid til Stortinget, og det varer livet ut, sa kongen til NTB under eit besøk på Pressens Hus i Oslo.