nyhende
Klokka 17.00 i dag vil det kosta 34 kroner å dusja i fem minuttar
Straumen blir svært dyr i delar av landet i dag. I området NO2 – Sørvestlandet, der Sveio høyrer til – blir maksprisen rekordhøge 13,39 kroner kilowattimen (kWh) før straumstøtte. I Nord-Noreg vil snittprisen i dag ligga på 12,1 øre.
Snittprisen ligg per kilowattime på 4,087 kroner i Sørvest-Noreg torsdag. Maksprisen blir på 10,53 kroner mellom klokka 17 og 18 – men dette er før avgifter, straumstøtte og andre faktorar. Tek ein med moms, forbruksavgift og avgift til Enova aukar han til 13,39 kroner. Då vil det kosta deg 34 kroner å dusja i fem minuttar.
2,87 kroner høgare enn same dag i fjor
Etter straumstøtte blir prisen i realiteten 2,14 kroner. Nettleiga kjem i tillegg. Trekk ein frå straumstøtta, vil ein dusj i fem minuttar kosta «berre» 12 kroner.
Snittprisen per kWh torsdag er 1,51 kroner høgare enn onsdag og 2,87 kroner høgare enn same dag året før, viser tal frå hvakosterstrommen.no.
I andre delar av landet blir det langt lågare prisar:
- Søraust-Noreg ligg på eit snitt på 2,81 kroner per kWh torsdag
- Vest-Noreg 1,22 kroner
- Midt-Noreg 89,1 øre
- Nord-Noreg ligg heilt nede på 12,1 øre for kvar kilowattime i snitt.
Prisane har vore høge dei siste dagane på grunn av lite fornybar energi på kontinentet.
