Klart for turbokøyr i Stortinget – 200 saker på tre veker

Ein fire år lang stortingsperiode går mot slutten. 20. juni tek Stortinget ferie og møtest ikkje igjen før etter valet i haust.

Dermed er det mange saker som må landast.

Allereie denne veka skal over 100 behandlast i Stortinget. Til saman er det rundt 200 saker som skal opp før sommarferien.

Her er nokre av sakene:

Tysdag 3. juni: 

• Ny barnehagelov skal vedtakast. Eit fleirtal beståande av Arbeidarpartiet, Høgre, Senterpartiet, Venstre, KrF og Pasientfokus er samde om nye reglar for styring og finansiering av barnehagane.
• Nye bubilreglar. Eit fleirtal beståande av Høgre, Senterpartiet, Framstegspartiet og Venstre har varsla at dei er samde om å be regjeringa endre på regelverket slik at ein kan køyre bubilar med inntil 4,25 tonn med vanleg førarkort (klasse B). I dag er grensa på 3,5 tonn.

Onsdag 4. juni: 

• Forslag frå SV om å trekkje oljefondet ut av okkupasjon og krigsbrotsverk. Får ikkje fleirtal.
• Endringar i tannhelselova , eit fleirtal frå Ap, Sp, SV og Raudt er samde om å utvide retten til nødvendig tannhelsehjelp frå 25 til 28 år. Dei vedtek også ei gradvis utviding av dei offentlege tannhelsetenestene.
• Røykeforbod på leikeplassar, idrettsanlegg og i bil med barn blir vedteke. Det blir også gjort fleire andre endringar i tobakksskadelova
• Forslaget til turistskatt skal behandlast. Det er enno litt uavklart korleis saka landar, men det er førebels ikkje fleirtal for det opphavlege forslaget.

Torsdag 5. juni:

• Eit forslag om ei erstatningsordning for overlevande og etterlatne etter Kielland-ulykka skal behandlast. Førebels uavklart korleis dette endar, men Ap og Høgre har vore negative til å stemme ja.
• Samtykkelova skal vedtakast. Den har breitt fleirtal i Stortinget.

Fredag 6. juni:

• Styrking av språklova. Krava til å skrive nynorsk i staten blir utvida.

Tysdag 10. juni:

• Rusreforma skal vedtakast. Her har Arbeidarpartiet, Høgre, Venstre og SV gått saman for å sikre fleirtalet. Dei er samde om at narkotika framleis skal vere forbode, men avhengige skal få hjelp i staden for straff.
• Forslag om å opne for narkohundar på skulane. Dette har berre støtte av Frp og Senterpartiet og får dermed ikkje fleirtal.
• Klimameldinga. Stortinget skal mellom anna bli samde om eit nytt klimamål. Førebels er det uklart korleis saka endar. Innstillinga frå energi- og miljøkomiteen kjem 3. juni.

Onsdag 11. juni: 

• Endringar i barnevernslova. Innstillinga kjem 4. juni.
• Innføring av bøter for brot på marknadsføringsreglane overfor barn. Arbeidarpartiet, Høgre, Senterpartiet, SV og Venstre sikrar fleirtal.

Torsdag 12. juni: 

• Havbruksmeldinga. Innstillinga kjem 5. juni.
• Minerallova. Innstillinga kjem 3. juni.
• Generell væpning av politiet. Innstillinga kjem 3. juni, men her er det allereie klart at fleirtalet er for. I løpet av våren har både Arbeidarpartiet, Senterpartiet og Høgre vedteke at dei er for generell væpning. Frå før av var også Frp for.
• Fleire innstrammingar i taxireglane.

Fredag 13. juni: 

• Dei tre mykje omtalte EU-direktiva som førte til at Senterpartiet gjekk ut av regjering i februar, skal vedtakast: Fornybardirektivet , Bygningsenergidirektivet og Energieffektiviseringsdirektivet. Arbeidarpartiet, Høgre, Venstre, Kristeleg Folkeparti og Miljøpartiet Dei Grøne sikrar fleirtal.

Måndag 16. juni: 

• Forslaget til noregspris skal opp til behandling. Innstillinga kjem 11. juni, men saka blir også del av forhandlingane om revidert nasjonalbudsjett mellom SV, Sp og Arbeidarpartiet.

Tysdag 17. juni: 

• Kommuneproposisjonen. Regjeringa har foreslått å gi kommunane mellom 4,2 og 4,9 milliardar kroner meir i frie inntekter neste år, men treng fleirtal i Stortinget. Innstillinga kjem 10. juni.

Fredag 20. juni: 

• Revidert nasjonalbudsjett for 2025. Dette forhandlar Ap med SV og Sp om no. Sp har mellom anna kravd kutt i matmomsen, medan SV har kravd gratis barnehage til alle.