Klare for basar og den 30. innsamlinga til Ukraina

Mange eldsjeler er engasjerte, både folk innanfor og utanfor Pinsekyrkja. Innsamlinga «tjuvstartar» på Fredagskafeen i Valevåg. Der blir det både innsamling av klede, sko, sengetøy, julegåver og anna, samt loddsal.

Laurdagen er det innsamling ved Soknehuset i Sveio, Pinsekyrkja Filadelfia i Auklandshamn og bedehuset i Førde.

Stor basar

Vil du bidra, pakkar du reine og heile klede, sko og anna i sekkar og leverer på ein av innsamlingsstadane. Det går mot ein hard vinter for mange i Ukraina, så tepper og tilsvarande blir motteke med stor takk. SOS Ukraina ber om 50 kroner per sekk til frakt, og det blir også loddsal på innsamlingsplassane.

Søndag er det klart for det som kanskje er den største basaren i Sveio i løpet av året med mange og flotte premiar. I år kan du mellom anna vinna brodert bringeduk og belte til sunnhordlandsbunad, ulike strikka premiar, dokkesett med klede og måleri av Stein Kåre Skimmeland. Det brukar å koma 100-150 personar frå heile Haugalandet, og rekordåret 2022 kom det inn 270.000 kroner.

Rekorden er 880 sekkar

Det som byrja som ein svært beskjeden start i 1994, har dei siste åra resultert i 200.000 kroner eller meir, og 400-600 sekkar med klede kvart år. Hjelpa blir formidla gjennom organisasjonen Open Heart i Drammen, der den utflytta haugesundaren Halvard Hasseløy er leiar. Mor hans kom frå Tittelsnes, og han har mange kjente i Sveio.

Dei første åra med innsamling handla det mest om klede. Toppåret var 2007, då sveibuane samla inn heile 880 sekkar med klede og sko. Seinare har talet på klessekker gått ned, men etter at Pinsekyrkja starta med basar i 2012, har inntektene auka kraftig. Pengane går til matutdeling og drift av av matstasjonar, dagheimar, overnattingssstader, medisinsk hjelp, rusavvenning og mykje anna.

Mat, klede og husrom

I starten gjekk mykje av hjelpa til dei som var råka av Tsjernobyl-ulykka i 1986. Seinare har folk som har falle utanfor av ulike grunnar, og ikke minst barn og barnefamiliar, fått mat, klede og til tider også husrom gjennom Open Heart sitt arbeid.

Sidan Russland annekterte Krim i 2014, og ikke minst etter at den fullskala krigen starta i Ukraina i 2022, har mesteparten av hjelpa blitt formidla til  krigsofra, særleg i dei austlegaste provinsane nærast fronten. Det er også gitt hjelp til ukrainske flyktningar i naboland som Polen og dei baltiske landa.