Kastar mindre i bosset

I året som gjekk kasta nordmenn til saman 2,1 millionar tonn søppel heime og på avfallstasjon.
Om ein ser berre på Sveio i 2022, så kasta folk 1620 tonn i heimen og 930 på miljøsentralen i Leitevegen. Det er ein nedgang frå 2021, kor sveibuene kasta 1720 tonn i heimen og 1034 tonn på miljøsentralen.

Meir attvinning

Ei undersøking frå Statistisk Sentralbyrå (SSB) viser at nordmenn generelt kastar mindre avfall, og at ein må tilbake til 2010 for liknande tal.

– Den totale avfallsmengda frå hushalda held fram med å søkke, med unntak av koronaåra. I 2022 har vi kasta den lågaste mengda avfall sidan 2010, sjølv om konsumet i hushalda gjekk opp, seier seniorrådgivar Manju Chaudhary i SSB.

Han meiner at mykje av dette skuldast aukande materialatvinning i befolkninga, som nå ligg på om lag 44 prosent.

– Me har sett ei aukande grad av materialattvinning for hushaldsavfall sidan 2015, seier Chaudhary.

Hos SIM ser tala liknande ut. Årsmeldinga til selskapet seier at total mengde hushaldavfall gjekk ned med 5 prosent.
Med hushaldsavfall inkluderer dei rest, bio, plast, papir og glas-og metallavfall.

Nådde ikkje måla

Samstundes såg SIM ein nedgang i besøkstalet på dei sju miljøstasjonane sine på 4,6 prosent.
Generelt er SIM positive i sin beskriving av situasjonen.

– Kvar innbyggar leverte 434 kg avfall i 2022. Totalt tok SIM hand om 26 666 tonn frå hushaldningane, kor størstedelen av desse var sorterte mengder som kunne gå til attvinning, heiter det i punk 6.4 i årsmeldinga.

Heile 95 prosent av hushaldsavfall som SIM tek i mot vert sendt til attvinning.

Det som må deponerast ligg på 5 prosent, samanlikna med det som atvinnast som materiale (39 prosent) eller energi (56 prosent).

Papir, glas og metall er døme på materiale og restavfall som brennast til oppvarming er døme på energiattvinning.

SIM er likevel ikkje nøgd. Eit mål sette av EU var at 50 prosent av hushaldavfall skal kunne attvinnast innan 2020.