Karnevalsgudstenester over heile landet

Gjennom helga er det meir enn 500 opne arrangement i Den norske kyrkja over heile landet. I Sveio kyrkje er det vanleg gudsteneste søndag, men det blir karnevalsgudsteneste litt seinare.

— Tidlegare har ofte fastelavnssøndag kollidert med vinterferien her hos oss. Me har difor brukt å legga karnevalsgudstenester til andre søndagar i fasten. I år blir det 12. mars i Sveio kyrkje, og me er i gang med planlegginga, seier sokneprest Gisle Sørhus.

Sommarfuglprest

Siste karnevalsgudsteneste i Sveio var like før pandemien. Då fekk soknepresten ei lita utfordring i samband med kostymet.

— Eg var utkledd som sommarfugl, og det viste seg at det ikkje var lett å få på seg prestekappa over kostymet. Det endte med at eg var kledd som sommarfugl heile gudstenesta, fortel Sørhus med eit smil.

12. mars er alle 6-åringar i Sveio spesielt invitert, og det blir også utdeling av 4-årsbok. Men alle er sjølvsagt velkomne til ei litt annleis gudsteneste der ein kan koma både utkledd og i vanlege klede.

Markerer inngangen til fastetida

I tillegg til karneval er det mange som markerer inngangen til fasta på andre måtar. Totalt viser Den norske kyrkja si arrangementsside skjerikirken.no nesten 500 arrangement i kyrkja fastelavnshelga, 17.–19. februar.

Karneval betyr «farvel kjøtt», og over heile verda markerer karnevalet inngangen til fastetida. I fastetida har tradisjonen vore at ein skal avstå frå kjøtt, leve enkelt og førebu seg på bodskapen i påska.

Fastelavn kjem av det nedertyske ordet for «kvelden før fasta», og blir brukt om dei tre dagane før fastetida. Fastetida startar på onsdag 22. februar, som blir kalla oskeonsdag. Tidlegare vart bodet om å faste, det vil seie avstå frå mat og drikke, teke bokstaveleg. Heilt fram til 1800-talet følgde mange fastetradisjonar her i landet.

Varer i 40 dagar

– Faste er eit høve til å rette merksemda mot det som verkeleg betyr noko, seier Kristin Gunleiksrud Raaum som er kyrkjerådsleiar i Den norske kyrkja.

Fastetida varer i 40 dagar frå oskeonsdag til og med påskeaftan – minus søndagane, som ikkje er fastedagar.

Gjennom fastetida inviterer kyrkjer til mange ulike type arrangement. Både gudstenester, konsertar, opne kyrkjer og temakveldar med fordjuping i kristen tru og tanke.