nyhende
Kaffi og te kan verne hjernen, ifølgje ny studie
Å drikke nokre koppar koffeinhaldig kaffi eller te dagleg kan gi eit lite bidrag til å verne om hjernekrafta og førebyggje demens, seier forskarane bak studie.
Den nye studien, som er publisert i tidsskriftet til den amerikanske legeforeininga Jama, er basert på ei spørjeundersøking blant 132.000 amerikanske vaksne over ein periode på fire tiår.
Dei som hadde det høgaste daglege inntaket av koffeinhaldig kaffi, hadde 18 prosent lågare risiko for å utvikle demens enn dei som hadde det lågaste inntaket. I gruppa som drakk mest kaffi var det også 2 prosentpoeng færre som melde om sjølvopplevde problem med minnet og tankar enn blant dei som drakk minst.
Forskarane seier dei fann liknande resultat for koffeinhaldig te, men ikkje for koffeinfrie drikker.
Sjølv om funna deira er oppmuntrande, understrekar forskarane at studien ikkje beviser at koffein bidreg til å verne hjernen.
– Om koffein har ein effekt, er han liten, og det er andre og betre dokumenterte måtar å verne den kognitive funksjonen på når folk blir eldre, seier leiaren for studien Daniel Wang frå Harvards medisinske institutt i ei fråsegn.
Tidlegare forsking har vist at livsstilsfaktorane som kan knytast til lågare demensrisiko inkluderer fysisk aktivitet, eit sunt kosthald og tilstrekkeleg søvn.
– Studien vår antydar at koffeinhaldig kaffi eller te kan vere ein del av det puslespelet, seier Wang.
(©NPK)
