– Du må kvile, seier dei. Men eg lever draumen, seier Tobias Sten

– Dart er avkopling og gøy, det er ein amatørsport der alle kan bli passeleg gode. Eg skal ha med dartsettet på turnébussen og køyre turnering med bandet backstage, seier Tobias Sten (22) og sender av garde ei pil.

Bannar når den ikkje treffer akkurat der han ville. Førebels verkar han mest treffsikker med låtane han sender ut. No kjem det ein ny ladning med nye moglege hittar på andrealbumet «Heimakjær», som blir sleppt torsdag.

Flytta heimanfrå

Tobias Sten valde sjølv å møte NTB på baren Ly på Grünerløkka i Oslo, som spesialiserer seg på dart og har skilt på veggen der ivrige spelarar blir formante til ikkje å halde på lenger enn éin time om det er kø.

Han har flytta frå heimøya Stord til Oslo no – i fjor haust, for å halde følgje med sin eigen kometkarriere – og bur i nabolaget.

– Nesten kvar dag er det nokon som spør om når eg skal flytte heim, frå bestemor mi og til fansen.

– Trenar

I fjor spelte Tobias Sten 80–90 konsertar, og færre blir det neppe i 2026. Han er alltid på farten. Måndag spelte han i Stockholm for dei svenske fansene sine, og vart intervjua på svensk fjernsyn.

Festivaldatoane ligg tett på turnélista, frå rockefestival på Spydeberg via den svenske cowboy-underhaldningsparken High Chapparal til den nye, norske festcountryfestivalen Rodeo – og kredible Bergenfest berre dei neste få mai- og junivekene. Han har jobbar booka uti november, det er på rakfiskefestival.

– Venner og familie skjønner det ikkje heilt. «Du må kvile», seier dei. Det er mykje. Men eg lever draumen og sørgjer for å trene. Eg har med joggeskoa på turné og prøver å sove åtte timar om natta, ete sunt og ta omega 3. Eg drikk ikkje før konsertar. Ein må behandle dette som toppidrett, og eg set pris på å vakne opplagt.

Sliten skriving

Kanskje det er derfor han har overskot til å skrive? Då røper Tobias Sten litt overraskande:

– Eg skriv ofte når eg er veldig sliten. Det kan vere backstage, det kan vere om bord på flyet på veg heim. Eg er veldig mykje på fly.

Då tek han opp mobilen og les inn nokre ord eller strofer på ein taleapp, og tek det vidare når han kjem heim til gitaren. Det nye albumet vart då til nettopp på hotellrom, backstage, på flyet, i dusjen og i bussen. På spørsmål om kva som inspirerer han, lyder svaret:

– Livet, kjensler, stemningar. Eg er ein kjenslevar fyr og eg tek lett inn stemningar. Venners, mine foreldres forhold – kanskje meir enn eg trur, mine eigne draumar og mitt eige liv. Eg vil skrive låtar eg kan stå inne for også mange år seinare. Dei er personlege,ß sjølv om ikkje dei skjedde akkurat i dag eller akkurat med meg, seier han frå barkrakken med eit vassglas og ein kaffikopp framfor seg.

Trongt på settlista

Tobias Sten kom som ei revolverkule i 2025 etter året før å ha vunne ein talentkonkurranse som faktisk halde det han lova og løfta fram «Noregs nye countrystjerne». Han har tidlegare uttalt at «2025 tok nakketak og snudde livet mitt opp ned, eitt år som kjem til å stå rissa inn i hjartet mitt».

Han vart den mest strøymde norske artisten i fjor med 100 millionar avspelingar. Seks Spellemann-nominasjonar følgde etter to P3 Gull. Debutalbumet vart kåra til den gjæve årets utgiving – og sjølv vart Tobias Sten utnemnd til Årets spelemann, heilt overraskande for han sjølv. Men allereie har han meir på hjartet og byr på 12 nye songar.

– Eg skreiv dette albumet medan eg promoterte det førre. Eg hadde sloppe musikk kvar dag om eg kunne, eg vil ha det ut – bli kvitt det. Men eg blir halden igjen, medgir han med eit skeivt smil. Derimot innrømmer at han har laga ris til eigen bak med å lage mange nye låtar han liker.

– No har eg 45 minutt på meg til å spele så mange låtar, seier han og strekkjer ut armane som om han fortalde ei fiskeskrøne.

Spelte Kurt på bar

Tobias Sten har prøvd dei nye songane på livepublikummet allereie: Først i Bergen sist helg, der over 10.000 fans møtte på Torgallmenningen, og på ein klubb i Stockholm måndag denne veka.

– Kven har du sjølv størst tru på?

Han nøler litt, og medgir at han er veldig glad i tittellåten, «Heimakjær», som han skreiv i jula då heile familien hans var samla og som treffer han sjølv.

– Eg likar «Sei det te meg» og «Ingen igjen» godt òg. Og så har eg ein bygdelåt – ein partylåt, for eg er jo bygdegut og ikkje berre trist, og det må eg vise fram! ler han.

På «Sista ordet» har han med seg sjølvaste Kurt Nilsen som gjesteartist. Dei fann kvarandre over felles countryforkjærleik.

– Noko av det første Kurt sa til meg var at han hadde spelt med Willie Nelson. Eg har spelt låtane til Kurt Nilsen så mange gonger på bar, at eg berre spurde han, fortel Tobias Sten om korleis han fekk Kurt om bord.