Julelåtene i år – frå lettliva julebordsmoro til nostalgi, utanforskap og sakn

Ine Hoem med julesong om sakn

Ine Hoem har laga ein rørande julelåt kalla «Første desember», om å sakne nokon i adventstida etter at ho mista mor si i haust etter lang tids sjukdom.

– Eg skreiv denne songen medan mamma framleis levde. Det var ei slags førebuing på noko eg visste kunne skje, at eg skulle møte desember i år utan henne, uttaler Ine Hoem.

Darling West med jul i uptempo

Der mange har ganske så nedpå julelåter, byr americanayndlingane Darling West på ein uptempolåt kalla «Holiday for Two» – som med Mari Sandvær Kreken og Tor Egil Kreken i spissen byr på både bjøller og gitarsolo.

Samisk jul med Kajsa

I fjor song Kajsa Balto den første julekonserten på samisk i Operaen, med tonefølgje av Kringkastingsorkesteret. Konserten vart vist på NRK i fjor, og no kjem albumet «Sámi Juovllat Operas – Samisk jul i Operaen» med både klassiske julesalmar omsett til samisk, tradisjonelle samiske julesongar og nyskrivne songar.

– Eg håpar at denne plata kan inspirere til at samiske perspektiv blir ein naturleg del av fleire samanhengar, også i jula, seier Balto.

Demker tok med Harket

Johanna Demker kjem med ein melankolsk julesong, der ho skreiv teksten saman med Morten Harket, under tittelen «Walk Me Through This Time Of Year».

– Songen handlar om å ha noko eller nokon å lene seg på når ein er sårbar, og om å våge å gi slipp. Denne kjensla blir ofte forsterka i juletida, seier Demker, som håpar låten kan «være en følgesvenn som går sammen med deg gjennom denne tiden på året».

Heilt album frå Ina Wroldsen

Julevinnaren når det gjeld innsats kan seiast å vera Ina Wroldsen, som skreiv heile 13 nye julesongar til albumet «The Business of Christmas» – som ho skal turnere med før jul.

Ho ville skrive songar om kva jula handlar om, som julestress og julekaos, å pynte eit bord til ni når ein eigentleg skulle ha vore ti, fordi ein mista nokon i løpet av året som gjekk, om å vilje rømme til ei solfylt øy – eller feire jul med kjærleikssorg, ifølgje omtalen.

Siste julelåt frå No. 4?

«Det var en gang en jul» er tittelen på årets nostalgiske julelåt frå No. 4. Den er den tiande julesongen til trioen, og den handlar om å prøve å rydde i minne.

– Korleis var det eigentleg? Hugsar eg det rett eller gale, og er det nokon som kan hjelpe meg å hugse. Planen om å lage éin julelåt i året viste seg å vere litt meir krevjande enn venta etter kvart, men no har vi i alle fall laga 10 stykk, så då kjennest det som om det er lov å gi seg, seier Emilie Christensen, Ingeborg Marie Mohn og Julia Witek.

Også Garnes-søstrene saknar

Garnes, som er søstrene Ingelin Reigstad Norheim og Hildegunn Garnes Reigstad, syng også om sakn i sin «Hører fortsatt klangen» – med ein tekst som går «Det blir aldri mer desember sammen med deg».

Men likevel kan «klangen av sangen personen sang med livet sitt, fortsatt høres», syng dei.

Kurt Nilsen på norsk

«Lov å ønske» er Kurt Nilsens første eigenskrivne julelåt – og på norsk. Den er også vemodig, der han skildrar lengten etter ei perfekt barndomsjul som kanskje er meir ein fantasi enn realitet.

– Denne låten fortel om korleis mange opplever jula på godt og vondt. Forventningane vi alle sit med i mørketida, ønska som ikkje alltid går i oppfylling, og tanken om korleis det var før, då vintrane var fulle av snø. Det er jo lov å ønskje, har han uttalt.

Frida Ånnevik med Juleroser-låt

Frida Ånnevik gir oss «Julekort og gammel dansk», som er årets nyskrivne song til artistkollega Herborg Kråkeviks «Juleroser»-prosjekt – som denne jula har englar som tema.

Nostalgi frå Matilda

Også Matilda ser tilbake i den engelskspråklege julesongen «Christmas Like It Once Was», mellom anna inspirert av oppveksten på Eidskog.

– Jula er så innmari magisk når ein er liten. Etter kvart som ein blir eldre så forsvinn denne magien meir og meir, seier ho.

Paul Hansen leita etter det ekte

– Eg ville skrive ein julelåt som kjennest ekte – både musikalsk og tematisk, seier Paul Hansen, no solo etter tidlegare innsats i Vamp og Cortina.

Det vart «I år», kalla ein varm og personleg song om å dra heim til jul etter mange år borte, med mellom anna Thom Hell på tangentar.

Eva Weel Skram venta lenge

Eva Weel Skram slepper i år «Kanskje til jul i år», som er hennar versjon av Ron Sexsmiths «Maybe This Christmas», ein av hennar eigne julefavorittar. Ho har gjort låten på konsertar, men måtte vente i årevis på løyve til å gi han ut.

– I år kom endeleg det formelle løyvet – og eg gler meg utruleg mykje til å dele min versjon, seier Weel Skram.

Victoria Nadines juleballade

Ein julelåt er Victoria Nadines siste utgjeving i år. Ho var med på å skrive balladen «Real To Me», som også er del av lydsporet til tredje runde med «Hjem til jul» på Netflix.

– Songen som først gjorde det mogleg for meg å satse på musikk på heiltid var nettopp ein ballade, så det å vende tilbake til dette kjenslerommet kjennest både nostalgisk og ekte, seier ho.

Maria Arredondo med filmlåt

Maria Arredondos julesong «Finne deg» er skriven til animasjonsfilmen «Reisen mot Nord» av filmens regissørar Bente Lohne og Rolf Løvland. Den er ute i både norsk og engelsk versjon, sidan filmen er kjøpt av svært mange land rundt i verda.

– Eg vart veldig lykkeleg då det var eg som fekk æra av å synge denne vakre låten, seier Maria Arredondo.

Staysman på julebord

Stian Staysman Thorbjørnsen er ute med låten «Julebord», der han tek opp førjulsfeiringa med ein tilhøyrande musikkvideo.

– Vi skal på julebord, akevitt med Askepott og nissemor, syng Staysman – for høvet ikledd mørk dress.

Mørk jul med Ledfoot

Ein av dei mørkaste julesongane til førjulstida, kalla «Somebody’s Heart», stammar ikkje uventa frå Ledfoot, alias Tim Scott McConnell.

– Ironisk at eg av alle menneske skriv ein song om kva eg synest jula burde handle om, nemleg kjærleik, omsorg, empati, familie. Og kor heldig du er som får vere ein del av nokon sitt hjarte, seier den norskbusette firebarnsfaren.

Ramons melankolske jul

Ramon laga julelåten han sjølv trong med «Ingenting er magisk», som tek opp einsemd, håp og tilhøyrsle.

– Mange ser jula som ei tid der ein bruker mykje tid med familie og gjerne kjem «hjem». Men kva med oss som ikkje kjenner vi har ein heim? Eg ville skrive ein song mest for meg sjølv, der eg kunne finne trøyst i at ein heim ikkje nødvendigvis er fire veggar og ein kjernefamilie, har han uttalt.