Jazz på dommens dag

Det var første gongen at det vart invitert til jazzmesse i Valestrand kulturkyrkje. Og kyrkjelyden let seg ikkje be to gonger, ifølgje sokneprest Arild Steinsland.

— Vanlegvis kjem det kring 12 personar når me har gudsteneste i Valestrand. No var det 107 personar i kyrkja. Og dei kom frå heile Sveio, fortel han.

At det vart ein lang gudsteneste, er ifølgje soknepresten ny personleg rekord – og at det klokka inn til 1 time og 24 minuttar, var ikkje noko dei frammøtte var lei seg for.

— Eg har ikkje halde ei så lang gudsteneste i heile mitt liv. Det var mykje song og musikk. I tillegg til preika og nattverd, fortel han.

Til doms for urett

Ifølgje den kristne liturgien var det domssundag sist sundag, og soknepresten nytta høvet til å snakke om urett i verd, og han brukte krigen i Ukraina som døme på urett menneskje oppleve i tida me er i.

I låtvalet til musikarane var det mange såkalla «negroes» – musikk skriven av folk som både vart fødde og døydde som slavar i Amerika, noko som ifølgje Steinsland gav ein ekstra klangbotn i opplevinga til dei frammøtte.

At Anastasiia Nuzhnaya, ein av dei første ukrainske flyktningane som kom til Sveio i vår, bidrog med jazzsong under gudstenesta gjorde truleg opplevinga for dei frammøtte ekstra kjensleladd. Det vart også heldt innsamling for ofre for krigen i Ukraina.

Fotball-VM

Også det pågåande fotball-VM i Qatar, og korrupsjon, var tema i preika. Ifølgje bibelen skal Jesus Kristus kome tilbake og halde dom over levande og døde, og soknepresten er klar i trua på at dei som gjer seg ansvarleg for urett overfor dei svakaste får noko å svare for.

Steinsland ser ikkje vekk frå at det kan bli fleire gudstenester med musikk.

— Eg sa det i kyrkja sundag, at her har me kanskje skapt eit behov me ikkje visste at me hadde, seier soknepresten.