Ivrig naturfotograf fanga unikt motiv – blei vist på NRK

Denne hausten har Kåre Gårder jakta hjort og rådyr på Hovda, ei hjortekolle og eit rådyr har alt falle for kulene hans.

– Eigentleg synes eg det er trist å skyta dyr, men tanken på å invitera familien på ein god middag er jo forlokkande. Når kvota er brukt opp blir det meir fotografering, seier haugesundaren.

Sveio-hubro på NRK

Når Gårder sit på vakt observerer han ørn, hauk, falk og hubro, og ein og annan rev har også streifa forbi. På hemmeleg stad fôrar han jamleg hubroen, dette året var han heldig og fekk tatt fleire foto av ein søt hubrounge. Tidlegare i haust var hubroen «hans» på NRK-programmet «Natur i endring», etter at programleiaren Ulf Myrvold var blitt vist utkiksposten i Sveio.

Mår og hønsehauk

Ein mårfamilie med tilhaldsstad nær Halseid og Tveitaskog, hadde blitt svært fortrulege, men Gårder sine fotoplanar blei spolert av at uvedkomande la ut felle for dyra.

– Eg måtte starta heilt på nytt, og det har vore svært tidkrevjande, først no tre år etter har eg ei viss von om at stamma vil etablera seg igjen, fortel Gårder som er ute og matar måren ein eller to gonger i veka. Rosinar og honning er snaddermat for måren, blir me fortalt.

På Apelandsneset fôrar han hønsehauk. Det vil han halda fram med til våren og egglegginga, etter det let han fuglane vera i fred ei stund.

– Strategien er at no veit eg kva tidspunkt dei vanlegvis kjem tilbake for å eta, då skal eg vera klar med kamera.

Ulovleg køyring i utmarka

Som andre naturinteresserte er også Gårder oppteken av dei konsekvensar me menneske kan påføra naturen vår. Han er ikkje blid på dei mange som freser rundt med motorisert køyretøy i utmarka.

– ATV-køyring i utmarka har blitt eit større og større problem. Eg har merka det spesielt i Sveio, der er det spor på kryss og tvers i utmarka, og eg veit det er stort sett ungdomar som står bak. Dei er både observert og har blitt snakka til, utan at det har hjelpt det grann, seier naturfotografen som ikkje legg skjul på at han er irritert.