nyhende
INP ut av kommunestyret
Tysdag sende leiar av Sveio INP, Cato Sivertsen, ut ei pressemelding der han skriv at både Sivertsen sjølv og representant Jan Øyvind Gravdal forlet Sveio INP.
I pressemeldinga skriv Sivertsen:
– Avgjerda kjem som ei følge av den omfattande konflikten mellom INP Sentral og Vestland INP, som me meiner er øydeleggande for partiet.
Sjølvstendige representantar
Sivertsen og Gravdal uttalar at situasjonen har blitt nedbrytande for omdømet til partiet, og at konflikten har lite å gjera med lokalpolitikken i Sveio. Dei understrekar at dei ønsker å representera verdiar som er i tråd med det dei lova veljarane sine.
Dei to representantane har bestemt seg for å halda fram som sjølvstendige representantar i kommunestyret. Dei legg vekt på at dei vil samarbeida tett for å kunna representera veljarane sine på best mogleg måte.
Framleis dedikerte
Sivertsen og Gravdal skriv at dei forsikrar veljarane om at dei framleis er dedikerte til å arbeida for interessene til innbyggarane i Sveio, og at dei held fram med å kjempa for dei sakene dei gjekk til val på.
Dette betyr at INP ikkje lenger vil vera representert i kommunestyret i den valde perioden frå 2023 til 2027.
Vestavind har vore i kontakt med både Sivertsen og Gravdal, men ingen av dei vil uttala seg om saka ut over det som står i pressemeldinga.
