nyhende
I desse fylka finn du dei mest tolmodige sjåførane
1000 nordmenn har svara på korleis dei reagerer på uventa bilkø. Nokre vert sinte og stressa, andre vil prøve å snike seg fram. Og her er fylkesforskjellane store.
– I snitt seier 1 av 5 at dei stressar i kø eller prøvar å snike. Det betyr at 20 prosent har kortare veg til dårlegare avgjersler i trafikken. Ein sjåfør som er stressa eller sur, er ofte ein uoppmerksam sjåfør, seier fagsjef i Frende forsikring Roger Ytre-hauge.
Så mange vert oppkava eller prøver å snike i kvart fylke:
- Finnmark: 34 prosent
- Rogaland: 28 prosent
- Buskerud: 26 prosent
- Vestland: 22 prosent
- Troms: 21 prosent
- Innlandet: 20 prosent
- Oslo: 20 prosent
- Vestfold: 19 prosent
- Akershus: 19 prosent
- Agder: 17 prosent
- Trøndelag: 17 prosent
- Østfold: 16 prosent
- Telemark: 14 prosent
- Nordland: 11 prosent
- Møre og Romsdal: 9 prosent
– Det som overraskar meg mest er fylka i botnen. At folk i Nordland og på mørekysten er så sindige, ante eg ikkje, seier Ytre-Hauge.
To typiske kø-ulykker viser seg i skadestatistikken; påkøyringar bakfrå og forbikøyringskollisjonar. I 2024 var det meir enn 46.000 påkøyringar bakfrå, medan talet på uhell i samband med forbikøyring låg på rett over 13.000.
– Totalt kosta desse ulykkene 1,8 milliardar kroner. 1,4 milliardar av desse gjekk til påkøyringar bakfrå. Dette er gjerne ulykker i låg fart, men dei kostar enormt mykje, seier Ytre-Hauge.
