Her vil dei ha fleire menn

— Det er som å kome til ein plass der ein alltid har vore etterlengta, seier Jonas Alexius Skalin.

37-åringen kjem opphaveleg frå Umeå i Sverige, og flytta til Sveio frå Haugesund i januar 2022. Han er glad for å kunne dele historia si, om korleis han vart det som kallast ein helserekrutt.

Eit teikn på å byte

Han hadde høyrt om Menn i helse tidlegare, og hadde vore interessert. Då ein skade i menisken gjorde at han vart sjukemeldt frå jobben på eit lager, gjekk det eit lys opp for han.

— Eg tok det som eit teikn på at eg skulle byte bransje, seier Skalin.

Han byrja som helserekrutt sommaren 2022. Sidan har han veksla mellom skule og praksis ved omsorgssenteret i Sveio, to veker anna kvar stad. Det synest han gjev ein effektiv opplæring.

— Viss du tenker skule og tar helsefagyrket, då har du først skule og så praksis, seier Skalin.

Sjølv er han ferdig med skulen til sommaren. Då kan han byrja å jobbe som lærling, noko som han gler seg til.

— Det er heilt nydeleg å vere på ein slik plass, seier Skalin.

Raud tråd i god helse

På omsorgssenteret jobbar han på avdelinga med pasientar som mellom anna er råka av demenssjukdom og Parkinsons sjukdom. Der kan han sjå at Menn i helse-programmet har eit poeng.

— Har du mannlege kollegaer?

— Eg har ein mannleg kollega, som også er min rettleiar. Me er to menn på to avdelingar, seier Skalin.

Kvardagen i omsorgsyrket byr på forskjellege oppgåver, samstundes som han meiner det er ein klar, raud tråd i arbeidskvardagen.

— Folk som lurar på korleis yrket er, trur det mogelegvis berre er å følgje nokon hit eller dit, men det meste av tida handlar om å gje folk ein fullverdig kvardag, seier han.

Sjølv om det er i endring, er det framleis ein stor ubalanse mellom kjønna i helsesektoren. Åtte av ti tilsette er kvinner. Skalin peiker på at nokre førestillingar kan henge att frå gamalt av, og er tydeleg på det ikkje er slik.

— For menn er det gjerne litt tabu, og at ein berre hjelper folk å gå på do. Men, god helse er ikkje berre fråvær frå sjukdom. Det er at heile deg vert godt teken vare på, seier han.

Forutan sjølve omsorga, er det også ein del tekniske oppgåver.

— Me sjekkar til dømes blodverdiar, oksygenmetting og helsetilstanden deira, seier Skalin.

Motivasjonen hans er mellom anna kva jobben gjer for andre. Det er fint å kunne gje noko tilbake, fortel han.

— Det kjennast godt å ta vare på andre og gje dei ein verdig kvardag, seier Skalin.

I eit lengre perspektiv ynskjer han vidare utdanning, slik at han kan jobbe med ungdomar som har det vanskeleg, eller dei med rusproblem.

— Eg har sjølv hatt utfordringar i ungdomen. Eg veit kor vanskeleg det kan vere å snu noko vondt til noko godt, seier Skalin.

— Ingen har angra

Han klarte å gjere ei endring. Det gjer at han forstår kor mykje det å hjelpe andre kan bety, uansett kva bakgrunn eller om dei er ung eller gamal. Slik erfaring gjev ein perspektiv på livet.

— Eg er takksam for kvar einaste dag og alt eg har i livet, seier Skalin.

Saman med sin sambuar og fem barn trivst han godt på Vikse, som han meiner er ein flott stad å bu. 2022 var eit år med ny bustad og nytt yrke. Skalin håpar han kan vere til inspirasjon for andre karar, som vurderer å gjere eit sprang.

— Anbefaler du helsesektoren til andre menn?

— Definitivt! Eg har ikkje møtt nokon i Menn i helse eller frå tidlegare kull som angrar. Heller motsett, frå dei som ikkje torde å hive seg på, seier han.