nyhende
Kyrkjeskatt fungerte som grisetrau:
Her er døypefonten i dag
Døypefonten er truleg frå den eldste stavkyrkja som stod i Sveio. Han blei seld på auksjonen i 1858, der heile den rivne gamlekyrkja med inventar blei seld. Styrk Fjærtoft, lensmann i Sveio, oppdaga fonten då han skulle krevja inn skatt på Kleivo på Vandaskog i 1912. Den gamle døypefonten blei då nytta som grisetrau.
Lensmannen kjøpte fonten for 12 kroner, som var den summen folket på Kleivo skulda i skatt. Fjærtoft ville først senda han til Sunnhordland folkemuseum. Men då han kom bort under sending og seinare funnen på dampskipsekspedisjonen på Leirvik, ombestemte han seg og overleverte i staden døypefonten til Sveio kommune i samband med det nye kommunehuset i 1925.
Klar til 100-års jubileet
Døypefonten blei pussa opp og sett inn i kyrkja i samband med 100-årsjubileet i 1958. I 1974 blei det laga sokkel på døypefonten, og han blei teken i bruk att. I dag står døypefonten litt bortgøymt og gløymd bak ei dør. Forhåpentlegvis får han med tida koma tilbake og igjen få skina litt i kyrkjerommet.
920 år med kyrkjehistorie
I Sveio har det sikkert stått to tidlegare kyrkjer like aust for den gamle Tjernagelvegen i sentrum, der det også er ein liten kyrkjegard. Den første av desse var ei stavkyrkje som blei bygd på 1100-talet og riven i 1688. Den blei då erstatta av ei tømra kyrkje som var i bruk fram til 1858.
Då kyrkje nummer to blei bygd i Sveio var det 700-800 innbyggjarar i soknet, mens dette talet auka til ikring 2000 i 1850-åra. Den store auken i folketalet var bakgrunnen for at den noverande Sveio kyrkje frå 1858, blei bygd såpass stor, med vel 600 sitjeplassar. Kyrkja er teikna av teologen Andreas Grønning.
Kjelde: Utdrag henta frå jubileumsboka til Sveio kyrkje.
Les meir om døypefonten og anna inventar i Sveio kyrkje på www.norgeskirker.no.
