Her bur dei mest hissige bilistane

Heile 74 prosent av dei kvinnelege bilistane som er spurt i den landsomfattande undersøkinga seier at dei lar seg fyra opp i trafikken. For menn er talet 69 prosent. Undersøkinga er gjort av Norstat for Frende Forsikring, skriv Frende i ei pressemelding.

Her er det mest kok i topplokket

1. Finnmark – 93 prosent
2. Møre og Romsdal – 86 prosent
3. Telemark – 83 prosent
4. Vestfold – 76 prosent
5. Buskerud – 75 prosent
6. Akershus – 75 prosent
7. Agder – 74 prosent
8. Østfold – 72 prosent
9. Oslo – 71 prosent
10. Rogaland – 70 prosent
11. Troms – 70 prosent
12. Innlandet – 69 prosent
13. Vestland – 65 prosent
14. Trøndelag – 63 prosent
15. Nordland – 55 prosent

Stressa sjåfør er ein farlegare sjåfør

–  Det er store forskjellar mellom fylkene. Det er ikkje godt å seia kvifor, men forskjellen mellom Finnmark og Nordland er på nesten 40 prosent. Dei fleste ligg imidlertid rundt 70 prosent, altså på landssnittet, seier Roger Ytre-Hauge, fagsjef på motor i Frende Forsikring,.

– Kvifor er dette interessant å vita? 

– Ein stressa eller sint sjåfør er ein farlegare sjåfør enn ein som er roleg og samla. Når du stressar, blir du også meir uoppmerksam. Å vera merksam er ein av dei aller viktigaste eigenskapane når du køyrer bil. Mange uhell og ulykker skjer fordi du ikkje følgjer godt nok med, og no om vinteren er det ekstra mykje å passe på, seier Ytre-Hauge.

Store forskjellar blant aldersgruppene

• 18-29 år: 69 prosent
• 30-39 år: 79 prosent
• 40-49 år: 83 prosent
• 50-59 år: 75 prosent
• 60+: 59 prosent

– Dei som er i 40-åra er klart mest stressa. Dette er blant dei mest stressande tiåra i livet for mange. Kanskje har dei små barn, bustadlånet er som størst, og dei prøver å sjonglera karriere og familieliv. Livet går litt på autopilot frå rutine til rutine, og då har du ikkje tid til å møta på køar, trafikkproblem eller folk som irriterer deg, seier Ytre-Hauge.

Til deg som kjenner deg igjen

Fagsjefen har ei klar oppfordring om du merker at fokuset ditt ikke er på vegen, eller tankane forsvinn andre stadar no på nyåret.

– Då bør du ikkje setta deg bak rattet før du har hovudet på plass. Og når du legg ut på vegane, ikkje trykk klampen i bånn. Hald fartsgrensa, legg bort dei forstyrrande tankane og hugs god avstand til bilen framfor, seier han.

Slik kan du unngå bilsmellen

• Ikkje stress, du sparar ikkje mykje tid på å køyra litt over fartsgrensa.
• Pust ut og aksepter tida det tar å koma fram.
• Tilpass farten etter vegforholda.
• Hald riktig avstand til bilen framfor deg.
• Hald merksemda på vegen.
• Om du skal lesa eller skriva SMS, køyr inn til sida og stopp heilt opp.
• Ikkje fikla med anlegg eller GPS medan du køyrer.
• Bruk handfriutstyr.
• Ta omsyn til mjuke trafikantar.

Kjelde: Frende