nyhende
Heimevernet skal øva i Sveio
Frå 17. til 20. april skal Heimevernet gjennomføra si årlege øving i Sunnhordland, men allereie frå 14. april vil det vera aktivitet i samband med øvinga.
Publisert
Rundt 150 soldatar skal delta i øvinga, som vil finna stad fleire stader i Sunnhordland, mellom anna på Tittelsnes leir og skytebaneanlegget på Kalland.
– Hovudføremålet er å øva og bli betre på soldatferdigheiter. Det blir både skytebaneteneste og feltteneste, seier liaisonoffiser Ole Velde i HV09-213.
Han er i permisjon i år og deltek ikkje sjølv i øvinga, men er godt kjend med opplegget.
Heimevernet i Sunnhordland høyrer til Bergenhus heimevernsdistrikt, som er eitt av 17 distrikt i landet. Nemninga HV09 viser til distriktet, medan 213 er området Sunnhordland.
Annonse
Aktivitet fleire stader
Sjølv om mykje av aktiviteten vil føregå på øvingsområda, kan publikum også sjå uniformert personell andre stader i Sveio og elles i Sunnhordland medan øvinga pågår. Ifølgje Velde vil dette skje sporadisk, mellom anna i samband med forflytting mellom områda.
Tittelsnes leir blir sperra av medan øvinga pågår, og skytebanen på Kalland vil vera stengd under skyteøvingane.
– Folk treng eigentleg berre å visa omsyn, så skal Heimevernet gjera det same, seier Velde.
