Haugesund har overtatt drifta av brannvesenet

– I naudsituasjoner er det framleis nummeret 110 som gjeld. Ved søknader, feiing og andre førespurnader er det derimot Haugesund brannvesen folk i Sveio skal kontakta, ikkje Haugaland brann og redning, seier Hoel vidare.

– Den næraste rykker ut

Når det gjeld utrykningar vil det ikkje bli noko endring.

– 110-sentralen styrer dette og sender alltid den brannbilen som er nærast. Det betyr at det kan koma brannbil frå Stord til ein naudsituasjon heilt nord i Sveio, medan brannbil frå Haugesund kan bli sendt til søre delen av kommunen. Det nye er at det kanskje kan bli lettare tilgang til ressursar frå Haugesund, forklarar Hoel.

Brannstasjonane i Sveio sentrum og Førde vil halda fram som før med eigne mannskap. Det er framleis Sveio kommune som skal eiga brannstasjonane. I Sveio sentrum skulle kommunen alt ha overtatt den nye brannstasjonen i Sveioåsen.

– Denne overtakinga er blitt utsett på grunn av noko som måtte endrast, seier kommunalsjef Kenneth Tollefsen til Vestavind.

Ny dato for overtakinga er ikkje fastsett. I Førde er det kjøpt inn tomt til ny brannstasjon, og reguleringsarbeidet er i gang etter fleire rundar om dette prosjektet i kommunestyret.

Vedtatt i 2023

Det var i november 2023 kommunestyret i Sveio vedtok å melda kommunen ut av Haugaland Brann og Redning og i staden inngå samarbeid med Haugesund om leiing og drift av brannvesenet.

Sidan då har overgangen blitt førebudd, og i romjula kunne ordførarane André Mundal Haukås og Nils Konrad Bua markera det nye samarbeidet på kommunegrensa ved Søre Våge. Denne markeringa blei først omtalt i Haugesunds Avis.