Haugaland Kraft Nett utset innføring av ny nettleige

NPK-NTB-VESTAVIND: Det melder selskapet i ei pressemelding fredag ettermiddag.

— Bakgrunnen er at myndigheitene har vald å utsette forskriftsendringa som skulle pålegge alle nettselskap i Noreg å endre nettleiga frå 1. januar, opplyser administrerande direktør Olav Linga.

Hensikten med den nye nettleigemodellen var å få ned forbrukstoppane i straumnettet og dermed halde kostnadane i straumnettet så låge som mogeleg. Straumkundar som klarer å jamne ut straumforbruket sitt skulle belønnast med lågare nettleige.

Det er opp til nettselskapene sjølv om dei ønskjer å vidareføre dagens modell eller innføre ny modell.

— Haugaland Kraft Nett har vedtatt å følgje myndigheitene og utsett ordninga, heiter det i meldinga.

Fleire gjer det same

Fleire andre selskap gjer det same.

Lnett (tidlegare Lyse Elnett) er det lokale nettselskapet til ni kommunar i Sør-Rogaland, og har i tillegg ansvar for overordna straumnett i Sør-Rogaland.

Lnett reknar med at Stortinget gjer vedtak om utsetjing, og beheld derfor dagens modell for nettleige òg etter 1. januar 2022, opplyser selskapet.

– Vi har førebels ikkje flytta kundar over til ny modell i systema våre. Det gjer at vi klarer å snu, og kan utsetje innføringa slik regjeringa no ønskjer, seier administrerande direktør Håvard Tamburstuen.

— Ikkje så vanskeleg likevel

Avgjerda til Lnett kjem kort tid etter at Energi Norge – Interesse- og arbeidsgivarorganisasjonen for energiselskap – hevda det er umogleg å utsetje den nye nettleigeordninga.

– Det er altså ikkje så himla vanskeleg å la vere å innføre ny nettleigeordning som enkelte skal ha det til, seier Lars Haltbrekken, SVs miljøpolitiske talsperson.

Haltbrekken var tidlegare fredag krystallklar på at energiselskap som ikkje utset den nye nettleigeordninga, må førebu seg både på omdømmetap, og at SV vil utfordre om ein slik framgangsmåte er lovleg.

Fredag ettermiddag opplyser òg Lofotkraft at dei utset innføringa av den nye modellen.

– Når Stortinget vedtek at det blir slik, følgjer vi i Elmea òg opp dette, stadfestar konsernsjef Arnt Winter i Lofotkraft Holding AS overfor Lofot Tidende.