Håpte på 30 – det kom 150

Sveio IL kalla inn til dugnad onsdag på kort varsel for å shina opp stadion før sesongen startar for alvor. Responsen var overveldande.

– Me håpte på 30, og enda på smått utrulege 150, fortel Lillian Rommetveit, dagleg leiar i Sveio IL.

Arbeidslista var lang:

Montera innbytterbenker, montera  4 nye 11er-mål, fiksa nett op alle 5er- og 7er-mål, montera vannpost-skilt, skifta nett på 11er-mål, festa tryggleiksnett rundt banen, fiksa ballvegg, fiksa tak på tribune, rydda og vaska kiosk, henga opp prosjektor, fiksa nedre del av streng langs heile kunstgrasbanen og kjøkken med mat etter dugnad.

Det siste blei travelt, og det gjekk ned over 200 pølser etter kvart som små og store dugnadsfolk var innom Sambrukshuset.

Fekk gjort det aller meste

Dugnadsansvarleg Rolf Kristian Aase oppsummerer dugnadskvelden på denne måten: – Heilt fantastisk!

Det var han som fann ut at det var på tide å kalla inn til dugnad for å få banen og området rundt på stell.

– Me er jo eit anlegg for heile Sveio og vil at det skal sjå skikkeleg ut. Me har den fantastiske dugnadsgjengen vår med pensjonistar som jobbar tysdagar, men dei rekk ikkje over alt. Med så mange i arbeid onsdag fekk me faktisk gjort det aller meste som sto på arbeidslista. Frå å henga opp skilt til ein del timars arbeid med å montera nye innbyttarbenkar, fortel han.

Gav seg då lyset sløkte

Aase, Espen Johannesen og Jon Tore Fosstveit var dei siste som forlet stadion. Då var klokka 22.30 og flaumlyset blei automatisk sløkt.

– Å festa tryggleiksnettet rundt heile banen var litt meir arbeid enn me hadde rekna med. Det var det einaste som ikkje blei heilt ferdig onsdag. Så me tok resten torsdagen, og heldt på til lyset sløkte då også, seier Aase, og takkar alle som var med på dugnaden.