Bli abonnent
Logg inn

nyhende

Lerøy Sjøtroll startar grønt skifte, og oppdrettsanlegget i Raunevågen (biletet) er først ut. I løpet av eit par år skal over 20 anlegg elektrifiserast som ein del av selskapet sin klimastrategi. Landskapet i bakgrunnen er Vikebygd.
Lerøy Sjøtroll startar grønt skifte, og oppdrettsanlegget i Raunevågen (biletet) er først ut. I løpet av eit par år skal over 20 anlegg elektrifiserast som ein del av selskapet sin klimastrategi. Landskapet i bakgrunnen er Vikebygd.

Grønt skifte i Lerøy Sjøtroll

Som ein del av ei større klimavennleg satsing, er Lerøy Sjøtroll i gong med å elektrifisera oppdrettsanlegget sitt på lokaliteten Raunevågen. Fleire anlegg står for tur. Investeringane har ein verdi på fleire titals millionar kroner.

Publisert Sist oppdatert
– Lerøy Seafood Group, som me er ein del av, vil om få år ha over 90 prosent av anlegga på landstraum. Det vil gi kutt i klimagassutsleppa tilsvarande 10.000 fossilbilar, seier dagleg leiar i Sjøtroll, Nina Møgster.

Meir enn 480 tilsette

Lerøy Sjøtroll er driftsorganisasjonen for havbruksselskapa Lerøy Vest AS og Sjøtroll Havbruk AS, der begge er selskap i det børsnoterte konsernet Lerøy Seafood Group ASA. Konsernet hadde i 2019 ein omsetnad på 20,4 milliardar kroner og har meir enn 4500 tilsette nasjonalt og internasjonalt. Lerøy Sjøtroll har 63 konsesjonar for matfisk i Vestland fylke, og produksjonen omfattar heile verdikjeda frå stamfisk til slakting. Lerøy Sjøtroll har meir enn 480 tilsette og omsetnaden i 2019 passerte 3,35 milliardar kroner med ein produksjon på 60.500 tonn laks og aure.

På lokaliteten Raunevågen nord for Staupe, driv Lerøy Sjøtroll produksjon av laks og aure. I meir enn 20 år har det vore laksemerdar på denne plassen. Anlegget skal no elektrifiserast. Dersom alt går etter planen er arbeidet ferdigstilt våren 2021.

– Utlegging av sjøkabel til lokaliteten Raunevågen er ein del av ei større satsing i Lerøy Sjøtroll der me går vekk frå dieselaggregat og over til klimavennleg landstraum. I løpet av ein toårs periode har me ein ambisjon om å elektrifisera over 20 anlegg i (tidlegare) Hordaland. Reduksjon av klimautslepp er heilt klart ei hovudmålsetting med investeringane. I tillegg er dette støyreduserande og fører til auka trivsel både for dei tilsette og for omgjevnadene våre, opplyser dagleg leiar i Sjøtroll, Nina Møgster.

Grønt skifte

Ifølgje Møgster skal selskapet i løpet av eit par år elektrifisera over 20 anlegg som ein del av deira klimastrategi. Anlegg som står for tur er Stualand som ligg lenger sør i same fjordarm som Raunevågen, og Grimsholmen i innløpet til Førdespollen.

Raunevågen har ein maksimalt tillate biomasse på 3120 tonn. Det blir sett ut fisk annakvar vår, og fisken står i sjø i opptil halvanna år.

– Akkurat no er lokaliteten tom, og me skal setja ut fisk til våren, opplyser Møgster. Ho legg til at Sjøtroll har tre tilsette på lokaliteten, og totalt 14 i Sveio.

– Sjøkabelen ut til anlegget er 0,5 kilometer, og er på heile 1000V, opplyser prosjektingeniør Kristin Alvsvåg i Haugaland Kraft AS.

22.000V i kabelgrøft

Arbeidet med å grava grøft til høgspentkabelen starta opp etter ferien, og blir utført av Karmøy-verksemda Danielsen & Saltvedt Maskin AS. Haugaland Kraft hentar høgspent frå eksisterande nettstasjon på Staupe.

– Høgspentkabelen, som er på 22.000V, skal leggjast i grøft langs eksisterande veg, ei strekkje på rundt to kilometer fram til Raunevågen. Me er no komne omtrent halvveges, men reknar med at siste biten vil ta litt lengre tid då det her er ein avstikkar med fleire kundar. Sjøkabelen ut til anlegget er 0,5 kilometer, og er på heile 1000V, opplyser prosjektingeniør Kristin Alvsvåg i Haugaland Kraft.

Legg til rette for 1200V: Karmøyverksemda Danielsen & Saltvedt Maskin AS, her representert ved Knut Veim t.v. og Henrik Stavland (læring) i oppdrag for Haugaland Kraft, er i desse dagar i ferd med å grava grøft for høgspentkabel frå Staupe fram til Lerøy Sjøtroll sitt oppdrettsanlegg i Raunevågen ved Ålfjorden. Til høgre Øyvind Flø Kvamsås frå Opplæringskontoret for anleggs og bergfagene (OKAB).
nyhende
Powered by Labrador CMS