nyhende
God grunn til å sjekka fødselsvekta di
Lege og forskar Anna Gjerde i Helse Fonna har studert fødselsvekta til over 2,6 millionar nordmenn. Dei som har låg fødselsvekt, veksthemming eller blei fødde for tidleg, har større risiko for å utvikle nyresjukdom som vaksne. – Funna er viktige for å kunne førebygga, oppdaga og behandla sjukdom tidleg, seier Gjerde.
– Alle bør sjekke fødselsvekta si for å finne ut om dei har auka risiko for å utvikle kronisk nyresvikt, seier Gjerde. Det er Helse Fonna som har skrive ei sak om Gjerde sine funn, ho er del av eit forskingsmiljø innan nyremedisin.
Det er lett å finna ut av fødselsvekta si for å sjå om det kan vera auka risiko for å utvikla kronisk nyresvikt.
Den er nemleg oppført i Medisinsk fødselsregister, som er det same registeret Gjerde og forskarkollegaene har brukt i studia. Sidan 1967 er alle fødslar i Noreg registrert her, over 2,6 millionar fødslar.
– Som låg fødselsvekt reknar vi gutar som var under 2 940 gram ved fødselen og jenter som var under 2 850 gram, seier Gjerde.
Risiko for premature og veksthemma
Studien hennar viser at også premature og barn som har opplevd veksthemming i svangerskapet har auka risiko for å utvikla kronisk nyresvikt som vaksne.
– Det er snakk om så mykje som 60-70 prosent auka risiko for å utvikle kronisk nyresjukdom, forklarar Gjerde.
Ho meiner dei som fell inn i risikogruppa bør ta ein prat med fastlegen sin.
– Me foreslår at fastlegar startar tidlegare med oppfølging av desse personane for å oppdaga begynnande nyresjukdom tidleg. Det inneber å jamleg måla blodtrykket, sjekka urinen og undersøka nyrefunksjonen, seier Gjerde og legg til at nyrelegar på sjukehus bør spørje pasientar om fødselsvekt ved første konsultasjon.
