Gler seg over kortreiste leikeapparat

— Denne zip-linen er skikkeleg kul. Og det som er bra er at me skal ha klasserom like ved den. Og me skal byrje i 5. klasse, og då får me lov til å bruke den i friminutta, fortel 10-åringane Charlotte De Winter Lier og Adele Huse Grimstvedt ivrig.

Også Adele si litlesyster, Live Huse Grimstvedt (8), synes det er stas med nye leikeapparat.

— Og når eg byrjar i 5. klasse, om to år, kan me jo leke her i friminutta alle tre, skyt ho inn.

Eit lite steinkast bortanfor står ein seks meter høg klatre-pyramide. Den er også montert nyleg. Nye utandørs treningsapparat er også på plass ved skulen.

Lokal leveranse

Det er Sveio-verksemda Norsk Lek og Park AS som har levert apparata i skulegarden. Der kan marknadssjef Sara Åberg fortelje om travle dagar.  Dei levere trenings- og leikeutstyr til kundar over heile landet. Dei største kundane er skuler og barnehagar, både offentlege og private.

Til skilnad frå dei fleste konkurrentane, som for det meste importerer og forhandlar utstyr frå utanlandske leverandørar, har Norsk Lek og Park sin eigen produksjonsavdeling på Hanaleite. Verksemda er faktisk ein av berre ein liten handfull produsentar av leikeapparat i Noreg som er sertifisert med såkalla Tüv-godkjenning. Sertifisering er kostbart, men ein viktig investering for verksemda, som tar mål av seg til å henge med i konkurranse også i åra som kjem.

Vurderer havplast

Norsk Lek og Park er også med på forsking og utvikling i sin bransje. Det handlar om gjenbruk av havplast.

— Me som bur her ved kysten, ser jo med eigne auge kor mykje plast som hamnar på strendene. I samarbeid med verksemda Ogoori AS ser me no på eit prosjekt kor me undersøker kva kvalitet og bestandigheit plasten som blir samla inn langs kysten har, for å sjå om den kan brukast som materiale i apparata våre, fortel ho.

Førebels er det på forskingsnivå, men selskapet håpar at tanken let seg materialisere gjennom nye leikeapparat med delar produsert av «kortreist» havplast.

— Får me det til som vi håpar, vil plast som er samla inn i Sveio, på Åkrasanden eller i andre nærområde gjere nytte for seg i våre leikeapparat i framtida, fortel ho.

Miljø-vekting

Det er ikkje tilfeldig at Norsk Lek og Park ser på miljøvenlege løysingar i eit kor stadig meir handlar om såkalla sirkulær økonomi, eller gjenbruk av verdiar om du vil.

— Me ser i stadig fleire offentlege anbod at miljø og berekraft blir vekta tyngre enn før i anbodsdokumenta, fortel ho.

Ho legg til at selskapet frå før ligg langt framme når det kjem til å ha fokus på miljø, mellom anna gjennom bruk av aluminium, som i stor grad kjem frå gjenbruksmaterele. Også gamle dekk får nytt liv i mange av apparata dei sel.

Verksemda har elles eit tett samarbeid med attføringsverksemda Uni-K i Haugesund, som tilpassar aluminiumen dei får frå Hydro på Karmøy til bruken Norsk Lek og Park skal ha det til. Det er også Uni-K som samlar inn dekk

For leveransar i nærområdet, monterer dei også utstyret.

—  Me er avhengige av tørt vêr når me monterer, så me er nøydd til å vere fleksible og kunne snu oss rundt i planlegginga. I lengre periodar med dårlig vêr hopar det seg gjerne opp, seier ho.

Norsk Lek og Park AS vart stifta av Svein Røykenes og sønnen Tor for over 20 år sidan, hadde først tilhald på Nedstrand i Tysvær. Men dei siste 15 åra verksemda hatt produksjonslokale på Hanaleite. Tor Røykenes er i dag dagleg leiar.

Dei vinn stadig nye anbodskonkurransar, og utfordringa er ofte å ha nok hender til å produsere det dei skal.

— Om det sitter nokre sveibuar der ute som har lyst til å jobbe, så er det berre å ta ein telefon, seier Åberg.