Gla’trimmen får fart på blodomløpet

– Fysisk aktivitet er god investering i eiga helse. Me har fått tilbakemeldingar på at eldre som har vore på sjukehus, har fått beskjed om at hadde dei ikkje trent og vore i så god form, så hadde dei ikkje fått den behandlinga dei elles ville fått. Det viser at sjølv om du er eldre, har trening svært mykje å seia for helsa, fastslår Edith Bergmål, som har vore instruktør i Gla’trimmen i ei årrekke.

Høgdepunkt midt i veka

Etter trimmen er det tid for sosialt samvær – for mange eldre eit høgdepunkt. Drøsen går, medan kaffi og frukt blir sett fram – alle er glade for å vera tilbake i normalt gjenge igjen. Snart kjem også songhefta på bordet.

Sofie og Kåre Røen flytta frå Sveio til Stord, men Gla’trimmen vil dei ikkje gje slipp på.

– Den korte køyreturen tek me gjerne for å få vera med på dette flotte tilbodet, seier ekteparet.

Plass til fleire

Gla’trimmen har i dag nær 30 medlemmer i alderen 60 til godt over 90 år. Aktiviteten blir driven i regi av frivillige. Som medlem betalar du ein liten sum, dette går til husleige, frukt og kaffi. Elles er alt det andre basert på dugnad.

– Me har blitt ein del færre, fleire av dei som var svært ivrige har gått bort, så no har me plass til fem-seks nye, fortel Willy Mjånes. Han er styremedlem i Gla’trimmen saman med Brit Karin Bruvik.

Det starta med turar

Torstein Gramshaug er ein av veteranane i gjengen.

– I 2005, då eg var med i eldrerådet, fekk me oppmoding om å prøva å få til aktivitet, då byrja me med turar i nærmiljøet. Totalt blei det gjennomført 70 turar, deretter gjekk me over til gymnastikk ein gong i veka i gamle banken i Førde, fortel Gramshaug.

Instruktøren får siste ordet, og snakkar på vegne av alle:

– Gla’trimmen er både trening og kos, me tek vare på kvarandre, og viss nokon er borte spør me etter han eller ho, og følgjer dei opp.