Fryktar for framtida til barnehagen

Då debatten kring skulenedlegging starta var barnehagen på Bua midt oppe i opptak for nye barn til neste barnehageår. Usikkerheita som debatten har medført er merkbar, ifølgje dagleg leiar Silje Huse i Bua kultur og friluftsbarnehage.

Har fått oppseiingar – fryktar fleire

– Me har har fått oppseiing av barn som skulle byrja hausten 2021, og me har fått signal om at det kan koma fleire oppseiingar på bakgrunn av dette. Ved ei eventuell nedlegging av skulen, er me redde for framtida til barnehagen. Omlag halvparten av barna hos oss kjem frå Auklandshamn, opplyser Huse.

Har hatt bra utvikling

Fire år er gått sidan Huse saman med Marianne Folgerø overtok Bua barnehage og døypte den om til Bua kultur og friluftsbarnehage. Etter den tid har talet på barn auka kvart år, og er nå oppe i 28 barn totalt.

– Me opplever mye positiv omtale frå foreldre og har per no sikker drift, opplyser barnehageleiaren.

Ho håpar på vegne av barnehagen og Samarbeidsrådet i barnehagen (SU), at politikarane kan sjå på heilskap og konsekvensane ei skulenedlegging i Auklandshamn vil påføra begge dei aktuelle bygdene.

Diskusjonen går

Ifølge Huse var det etter at dei blei kontakta av FAU i Auklandshamn, at dei bestemte seg for å skriva brev til kommunen. Då hadde diskusjonen alt pågått ei stund i barnehagen. Ei eventuell skulenedleggjing ville få ringverknad med tanke på at foreldre som skal henta på SFO i Førde, kanskje vil flytta ungane sine til Førde barnehage.

– På bakgrunn av dette fekk me i stand eit møte med SU, der det blei bestemt at me skulle skriva brev til kommunen og oppmoda om å få flytta skulegrensene, fortel Huse som ser mange fordelar med dette.

Ser mange fordelar

– Før borna byrjar på skulen skal me samarbeida med overgang ifrå barnehage til skulen. Det vil vera enklare å få til eit godt og tett samarbeid dersom me berre skal ha ein skule å forhalda oss til. Slik det er i dag har me to, Sveio og Auklandshamn, seier Huse og utdjupar:

– Ved å fjerna krinsgrensene mellom Bua og Auklandhamn vil det fremja eit mykje større samarbeid når det gjeld overgang barnehage-skule. Det er eit av argumenta som blir trekt fram i brevet som Bua kultur og friluftsbarnehage saman med SU i barnehagen, no har sendt administrasjonen og politikarane i Sveio kommune.