nyhende
Fritidsfiskarar landar meir torsk enn kommersielt kystfiske i Hordaland
Over fleire år kartla forskarane fritidsfiske i utvalde pilotområde ved hjelp av feltintervju, telefonintervju, fangstdagbøker og Fiskeridirektoratet sitt turistfiskeregister. Hovudmålet var å utvikle metodar for å finne ut kor stort uttak av fisk fritidsfiskarar står for.
Dei nye berekningane stadfestar at uttaket av fisk er vesentleg, særleg for enkelte artar.
– Vi har gode anslag for torsk og sei i både Hordaland og Troms. Mange av dei andre artane er høgst usikre, til dømes på grunn av få registreringar, seier havforskar Keno Ferter i ei sak på nettsidene til Havforskingsinstituttet (HI).
Større i Hordaland enn i Troms
I Troms landa fritidsfiskarar om lag 2.160 tonn torsk og 104 tonn sei. Dei fekk meir fisk enn det på kroken, men sleppte ut høvesvis 20 og 48 prosent – oftast fordi fiskane var for små.
I Hordaland landa fritidsfiskarar om lag 73 tonn torsk og 154 tonn sei, etter å ha sleppt ut 39 prosent av totalfangstane.
– Uttaket av torsk i fritidsfiske er mykje større i Hordaland enn i Troms når vi samanliknar med det kommersielle kystfisket i områda, seier Ferter.
Vil dekka heile kysten
Forskarane foreslår no ei rotasjonsordning der ein gjer feltundersøkingar i eit par fylke per år. Når heile kysten er dekt, startar ein om igjen.
– Det vil også vere viktig å få grep om fangstar i stongfiske frå land og frå fastståande reiskapar, avsluttar Ferter.
