nyhende
Fricamping betyr ikkje heilt fri camping
Allemannsretten står sterkt i Noreg og gjer at du kan slå opp teltet eller parkera bubilen friare enn i resten av Europa. – Skal du fricampa er det viktig å vera klar over at det er nokre avgrensingar, seier Nils Sødal, senior kommunikasjonsrådgivar i NAF.
Du har større fridom med telt enn om du køyrer bubil eller campervan. Bubilar, campervan eller bilar med taktelt må overnatta der det er mogleg å parkera.
– Det er mange moglegheiter for overnatting om du køyrer bubil eller liknande, seier Sødal. – Men ver klar over at det ikkje er fritt fram, seier han.
Hovudregelen er at du kan køyra og parkera med bubil, campervan, bil med campleit eller bil med taktelt langs offentleg veg på same måte som med vanleg bil. Du kan også køyra og parkera langs privat veg i utmark, så lenge grunneigaren ikkje har forbode ferdsel på vegen.
– Poenget når du skal overnatta der bilen skal stå parkert er at det må vera på ein veg og ikkje ute i naturen, seier Sødal.
Med bubil eller liknande kan du parkera og overnatta på rasteplassar, men det er vanlegvis ei tidsavgrensing på eitt døgn.
– Rundt dei største byane er det parkeringar på utfartsparkeringar ved skogen. Der er det lov å stå og overnatta om ikkje anna er skilta. Men ver merksam på tidsavgrensingane som gjeld. Det er ofte eitt eller to døgn, seier Nils Sødal.
Er du på bilferie med telt har du større fridom enn om du køyrer ein bubil. Bilen du køyrer følgjer dei same reglane som for bubilar, men teltet kan du slå opp utanfor vegen.
– Dette betyr at du i kan finna deg idylliske overnattingsstader der bubilane ikkje kan komma, seier Sødal.
