Bli abonnent
Logg inn

nyhende

Påstand om fråverande brøyting i år:

Håvardsholm Maskin på oppdrag for Mesta.
Håvardsholm Maskin på oppdrag for Mesta.

Forsikrar om at vinterberedskapen er ute dag og natt når det står på

Å halda vegane fri for snø og is er ein meiningsfull jobb som mange har meiningar om. Sveio kommune har ikkje hatt mange klager på brøyting og strøing på kommunale vegar i år, fylkeskommunen forsikrar om at entreprenørane har ei driftsklasse å retta seg etter – heile døgeret.

Publisert Sist oppdatert

Bakgrunnen for saka er at Vestavind har vore i kontakt med nokon som mellom anna har opplevd brøytinga som total fråverande i år, både på kommunale vegar og på Fv 47 i Sveio.

Sistnemnde vegstykke blir skildra som «natt og dag» når ein passerer fylkesgrensa på veg til Haugesund om natta eller morgonen – verst i vårt fylke. Vedkommande er redd for at det blir spart på brøytemannskap både her og der, som kan gå ut over liv og helse.

Me høyrer med to av dei som har hovudansvar for vegane her i Sveio korleis rutinane er.

Eige og innleigd mannskap

Sveio kommune har ikkje fått mange klagar på arbeidet dette året.

– Sveio kommune brøytar og strør dei kommunale vegane med ein kombinasjon av eige mannskap. Tre kommunalt tilsette og fem private firma har beredskapsvakt og rykkar ut for å brøyta og strø dei kommunale vegane i Sveio når det er behov, forklarar Frederik Aalo Flood, einingsleiar for drift- og anleggsavdelinga i Sveio kommune.

Tidkrevjande

Han synest at innsatsen har vore god frå brøytemannskapa dette året, og det har ikkje vore mange klagar på verken brøyting eller strøing på dei kommunale vegane.

– Når det snør heftig er det sjølvsagt ikkje mogleg å brøyta alt med ein gong. Det vil ta litt tid å komma seg gjennom alle vegane, seier Flood, som oppmodar til å ta kontakt med kommunen om nokon har noko spesielt eller viktig å melda.

Flood avkreftar at mannskapa har brøyteskjæret såvidt nedi bakken for å spara på utstyr.

– Er det lagt inn få vinterdagar i budsjettet, slik at de må spara på mannskap?
– Nei. Det er brøyting og strøing når forholda gjer det naudsynt, oppklarar Flood.

To kontraktar

Ved vêrskifte er det mannskap ute for å halda hjulspora på fylkesvegen fri for til dømes snø og is, dei har ei driftsklasse å retta seg etter.
Roger Lemme i Vestland fylkeskommune har ansvar for driftskontrakten på Fv 47 i Sveio. Han forklarar at vegen ikkje berre blir skilt av fylke, men òg to ulike driftskontraktar – kalla 1107 Haugalandet og 1208 Sunnhordland. Sistnemnde kontrakt høyrer til på Vestland-sida.

Same hovudentreprenør

– Felles for kontraktane er at Mesta AS er hovudentreprenør. At det skulle vera standardsprang på vinterdrifta ved fylkesgrensa, er ikkje noko byggeleiinga er kjent med – eller har registrert, seier Lemme.
Fylkesveg 47 i Sveio har vinterdriftklasse DkB middels. Det vil seia at godkjent føreforhold er bar veg (tørr eller våt) – hard snø eller is er tillate utanom hjulspor i avgrensa tidsrom, og maks 1 cm laussnø. Entreprenøren har to timar på seg til å bearbeida heile arealet sitt.

Heile døgeret

– I kontrakten me har med entreprenør er det sett krav om syklustid, der tidsbruken mellom kvar gong heile brøyte-/strøarealet er bearbeidd med brøyting eller strøing. Ved vêrhendingar (som oppklaring, påfrysing eller snøvêr), er maksimal syklustid for brøyting og/eller strøing på vegar som denne sett til 2 timar, opplyser Lemme, og legg til at godkjente føreforhold og krav til syklustid gjeld heile døgeret.
Det er ikkje slik at fylkeskommunen vil spara pengar på brøyting og strøing.
– Det blir brukt entreprenørar som må dokumentera at dei har nok ressursar for å oppretthalda syklustida, seier Lemme.
nyhende
Powered by Labrador CMS