nyhende
Foreslår overføring av kommunestyremøte på nett
Rådmann Jostein Førre foreslår at kommunestyremøta i Sveio skal overførast på nett, slik mange andre kommunar alt gjer i dag.
Ei overføringsløysing berre for kommunestyret vil krevja investeringar på 160.000 kroner og årlege driftskostnader på 35.000 kroner.
Saka blir lagt fram for formannskapet i tysdag og kommunestyret i midten av månaden.
Det var kommunestyret som i fjor haust ba rådmannen utgreia eventuell overføring på nett.
Rådmannen har sett på tre alternativ: Anten overføring berre av kommunestyremøta, overføring av kommunestyre- og formannskapsmøta eller også overføring av alle politiske møte inkludert hovudutvala. Kravet til utstyr og dermed investeringskostnadene vil auka med talet på møte som skal overførast.
Sist spørsmålet om direkte nettsending av politiske møte i Sveio var oppe til drøfting, var i 2015. Den gongen sa kommunestyret nei til overføring.
