nyhende
Forbrukarrådet åtvarar mot valutafelle i sommarferien
Å betale og å ta ut pengar i minibanken når du er på ferie i utlandet, blir ofte unødvendig dyrt. Forbrukarrådet åtvarar deg mot å gå i fella.
Når du betaler med kort eller tek ut pengar utanlands, vil du få valet om du ønskjer å betale i norske kroner eller den lokale valutaen.
Forbrukarrådets råd er lett: Du bør alltid betale i den valutaen som blir brukt i det landa du besøkjer.
Nær fire gonger dyrare
– Avvis tenesta om å bli belasta i norske kroner. Du får eit litt romslegare feriebudsjett når du bruker den lokale valutaen. Det er alltid lurt, og spesielt no som kronekursen er såpass svak, seier Nora Wenneberg Gløersen, forbrukarjurist i Forbrukarrådet.
Dersom du vel å betale i norske kroner, er det den lokale banken eller butikken i ferielandet som set valutakursen. Normalt svarer han til eit påslag på seks til sju prosent.
Det er nær fire gonger så dyrt som standardkursen til betalingskorta.
Viktig å velja rett
Også når det gjeld betalingsterminalen er det viktig å velje rett – ein kan fort bli villeidd av piler, flagg, fargar og feilaktige åtvaringar.
– Vel alltid «no conversion» når du får valet mellom «conversion» og «no conversion». Vel du «conversion» kan beløpet du har betalt bli omrekna med eit stort påslag, seier Gløersen.
Ei fersk undersøking frå Forbrukarrådet viser at sju av ti har kjennskapar til at det lønner seg å ta ut/betale i lokal valuta på ferie i utlandet.
