nyhende
Folkemøte om solkraftverk
I samband med konsesjonsbehandlinga for Nesse solkraftverk, inviterer NVE til folkemøte i kommunehuset på Sveio onsdag 11. september.
NVE inviterer også til synfaring på Nesse Gard tidlegare same dag. Både synfaringa og folkemøtet er ope for alle interesserte.
Søknad frå Endra AS
Det er Endra AS som har søkt om konsesjon for bygging og drift av solkraftverk på garden til Steinar Nesse. Området der det er planar om å setja opp solcellepanel er på 142 dekar og blir i dag brukt til beitemark. Det skal også i framtida vera mogleg å ha dyr på beite rundt solcellepanela. Nesse ser for seg at spelsauene hans skal få plass på dette beitet. Han blei intervjua om planane i første utgåve av Vestavind i 2024.
Det planlagde solkraftverket vil få ein årleg produksjon på 10,2 gigawattimar (Gwh) i året, går det fram av konsesjonssøknaden. Endra AS håpar på oppstart av utbygginga i slutten av 2025 og oppstart av drifta i første del av 2026.
Høyringsfrist
Konsesjonssøknaden med konsekvensutgreiing er no tilgjengeleg på NVE sine nettsider. Frist for å senda inn innspel og høyringsfråsegner er 25. oktober.
