nyhende
Overgrepa mot 14-åring:
Fleire saker ferdig etterforska
I sist veke blei ein Ap-politikar frå Sveio dømt for overgrep mot ein gut som var 14 år då dei straffbare handlingane skjedde. To andre saker ligg no på statsadvokaten sitt bord i påvente av avgjerd om tiltale.
Dei to mennene som dette gjeld, er tiltalte for overgrep mot den same guten. Begge mennene er busette på Haugalandet, opplyser politiadvokat Else Saltveit Lokna i Sør-Vest politidistrikt til Vestavind.
Elleve mistenkte eller sikta
Lokna var aktor i straffesaka mot sveiomannen som nettopp er dømd. I alt har elleve personar status som sikta eller mistenkte for overgrep mot den same guten. Desse elleve kjem i tillegg til han som alt har fått dommen sin.
Dei sakene som framleis er under etterforsking er på ulike stadier i etterforskinga.
Det er også nokre saker som er ferdig etterforska og ventar på avgjerd om påtale. Nokre av desse kan avgjerast av påtalemakta i politiet, nokre må avgjerast av statsadvokaten. Det kjem an på kva straffebod som er brote, opplyser Lokna vidare.
