Fleire permitterte er i arbeid

– Arbeidsløysa utviklar seg framleis i positiv retning, men med ei meir flatare kurve dei siste månadane. Det er færre permitterte, og i oktober er det stor nedgang blant dei som var delvis ledige. På same tid som arbeidsløysa går ned, er me bekymra for dei som vart råka i mars, og som no enno ikkje er kome attende jobb, seier Astrid Østerlid, leiar i NAV region Sunnhordland i ei pressemelding.

I oktober blei 2,3 prosent (67 personar) av arbeidsstyrken i Sveio registrerte som arbeidsledige. Snittet for året så langt er 3,9 prosent (113 personar).

Tilpassar seg tiltaka

Etter nedstenginga av Noreg var ein av konsekvensane ei rekordhøg arbeidsløyse. I Sunnhordland var den på det meste 7,6 prosent av arbeidsstyrken. Nye nasjonale innstrammingar og lokale koronatiltak påverkar næringslivet.

– Me håpar og trur at me unngår same tilstandar som i mars og april. Inntrykket vårt er at verksemdene i regionen er gode på omstilling og tilpassar seg tiltaka, og på den måten klarar halda hjulene i gang, seier Østerlid.

NAV har ikkje motteke varsel om masseoppseiingar eller permittering den siste månaden.

NAV held ope

NAV sine tenester er tilgjengeleg for alle tenestemottakarar i Sunnhordland. Oppdatert informasjon er alltid å finne på nav.no.

– Me oppmodar alle om å nytta dei digitale løysingane på nav.no så langt som råd. NAV-kontora er opne for publikum som må ha eit fysisk møte, seier den lokale NAV-leiaren.

Arbeidsgjevarar er også oppmoda om å ta kontakt om dei har behov for råd og rettleiing.
Nokre treng arbeidskraft, medan andre har spørsmål om permittering eller sjukefråversoppfølging. Våre tilsette er også tilgjengeleg for dei, seier Astrid Østerlid.