nyhende
Fire søkjarar til to rektorjobbar – alle lokale
Det har meldt seg fire søkjarar til stillinga som rektor ved Førde skule. Tre av dei har også søkt stillinga som rektor i Auklandshamn.
Søkjarliste til Førde og Auklandshamn:
- Arve Myklebust, rektor Valestrand oppvekstsenter, 5551 Auklandshamn – søkjer begge stillingane
- Camilla F. Tverfjell, konst. rektor Auklandshamn, 5551 Auklandshamn – søkjer begge stillingane
- Hege H. Steindal, fag- og kontaktlærar HTG, 5555 Førde i Hordaland – søkjer rektor, Førde skule
- Bjørn Tore Enerstvedt, leiar FOS, 5550 Sveio – søkjer begge stillingane
Tre rektorstillingar
Det er ialt tre skular det blir søkt rektorar/einingsleiarar til i Sveio. Solveig Skattkjær sluttar som rektor på Vikse for å byrja som spesialrådgjevar kompetanseutvikling i Viken fylkeskommune.
Skattkjær har vore rektor på Vikse skule sidan 1. august 2017. Før det var ho rektor og styrar på Valestrand oppvekstsenter i to år.
Camilla F. Tverfjell, er for tida konstituert rektor ved Auklandshamn skule. Ho er også på søkjarlista til rektorstillinga.
Går av etter 41 år
Avtroppande rektor ved Førde skule, Solveig Røynstrand, har vore tilsett i Sveio kommune sidan 1980, fram til 2000 var ho lærar ved Sveio skule. Etter det har ho hatt sitt arbeid på Førde skule, først som undervisningsinspektør, og frå 2004 som rektor. Snart går ho inn i pensjonistane sine rekkjer, noko ho gler seg til.
– Eg vil nytta meir tid til å ta opp att hobbyane mine, som meir eller mindre har blitt lagt på hylla i mange år. Dei kjekkaste hobbyane handlar om handarbeid, alt frå strikking til montering av bunader, men å lesa gode bøker er også viktig. Og sjølvsagt blir det meir tid til å vera saman med barnebarna. Og ikkje minst, når det blir mogeleg, vil eg og ektemannen reisa igjen; først av alt til Berlin, opplyser Røynstrand.
